.. ଅକ୍ଷ୍ଯୁପନିଷତ୍ ..
ଯତ୍ସପ୍ତଭୂମିକାବିଦ୍ଯାବେଦ୍ଯାନନ୍ଦକଲେବରମ୍ .
ବିକଲେବରକୈବଲ୍ଯଂ ରାମଚନ୍ଦ୍ରପଦଂ ଭଜେ ..
୐ ସହ ନାବବତୁ ସହ ନୌ ଭୁନକ୍ତୁ
ସହ ବୀର୍ଯଂ କରବାବହୈ .
ତେଜସ୍ବିନାବଧୀତମସ୍ତୁ ମା ବିଦ୍ବିଷାବହୈ ..
୐ ଶାନ୍ତିଃ ଶାନ୍ତିଃ ଶାନ୍ତିଃ ..
ହରିଃ ୐ ..
ଅଥ ହ ସାଂକୃତିର୍ଭଗବାନାଦିତ୍ଯଲୋକଂ ଜଗାମ .
ତମାଦିତ୍ଯଂ ନତ୍ବା ଚାକ୍ଷୁଷ୍ମତୀବିଦ୍ଯଯା
ତମସ୍ତୁବତ୍ . ୐ ନମୋ ଭଗବତେ ଶ୍ରୀସୂର୍ଯା- 
ଯାକ୍ଷିତେଜସେ ନମଃ . ୐ ଖେଚରାଯ ନମଃ .
୐ ମହାସେନାଯ ନମଃ . ୐ ତମସେ ନମଃ .
୐ ରଜସେ ନମଃ . ୐ ସତ୍ତ୍ବାଯ ନମଃ .
୐ ଅସତୋ ମା ସଦ୍ଗମଯ . ତମସୋ ମା ଜ୍ଯୋତିର୍ଗମଯ .
ମୃତ୍ଯୋର୍ମାଽମୃତଂ ଗମଯ . ହଂସୋ ଭଗବା- 
ଞ୍ଛୁଚିରୂପଃ ପ୍ରତିରୂପଃ . ବିଶ୍ବରୂପଂ ଘୃଣିନଂ
ଜାତବେଦସଂ ହିରଣ୍ମଯଂ ଜ୍ଯୋତୀରୂପଂ ତପନ୍ତମ୍ .
ସହସ୍ରରଶ୍ମିଃ ଶତଧା ବର୍ତମାନଃ ପୁରୁଷଃ
ପ୍ରଜାନାମୁଦଯତ୍ଯେଷ ସୂର୍ଯଃ . ୐ ନମୋ
ଭଗବତେ ଶ୍ରୀସୂର୍ଯାଯାଦିତ୍ଯାଯାକ୍ଷିତେଜସେଽହୋବାହିନି
ବାହିନି ସ୍ବାହେତି . ଏବଂ ଚାକ୍ଷୁଷ୍ମତୀବିଦ୍ଯଯା ସ୍ତୁତଃ
ଶ୍ରୀସୂର୍ଯନାରାଯଣଃ ସୁପ୍ରୀତୋଽବ୍ରବୀଚ୍ଚାକ୍ଷୁଷ୍ମତୀ- 
ବିଦ୍ଯାଂ ବ୍ରାହ୍ମଣୋ ଯୋ ନିତ୍ଯମଧୀତେ ନ ତସ୍ଯାକ୍ଷିରୋଗୋ
ଭବତି . ନ ତସ୍ଯ କୁଲେଽନ୍ଧୋ ଭବତି . ଅଷ୍ଟୌ
ବ୍ରାହ୍ମଣାନ୍ଗ୍ରାହଯିତ୍ବାଥ ବିଦ୍ଯାସିଦ୍ଧିର୍ଭବତି .
ଯ ଏବଂ ବେଦ ସ ମହାନ୍ଭବତି .. ୧..
ଅଥ ହ ସାଂକୃତିରାଦିତ୍ଯଂ ପପ୍ରଚ୍ଛ ଭଗବନ୍- 
ବ୍ରହ୍ମବିଦ୍ଯାଂ ମେ ବ୍ରୂହୀତି . ତମାଦିତ୍ଯୋ ହୋବାଚ .
ସାଂକୃତେ ଶୃଣୁ ବକ୍ଷ୍ଯାମି ତତ୍ତ୍ବଜ୍ଞାନଂ ସୁଦୁର୍ଲଭମ୍ .
ଯେନ ବିଜ୍ଞାତମାତ୍ରେଣ ଜୀବନ୍ମୁକ୍ତୋ ଭବିଷ୍ଯସି ..୧..
ସର୍ବମେକମଜଂ ଶାନ୍ତମନନ୍ତଂ ଧ୍ରୁବମବ୍ଯଯମ୍ .
ପଶ୍ଯନ୍ଭୂତାର୍ଥଚିଦ୍ରୂପଂ ଶାନ୍ତ ଆସ୍ବ ଯଥାସୁଖମ୍ .. ୨..
ଅବେଦନଂ ବିଦୁର୍ଯୋଗଂ ଚିତ୍ତକ୍ଷଯମକୃତ୍ରିମମ୍ .
ଯୋଗସ୍ଥଃ କୁରୁ କର୍ମାଣି ନୀରସୋ ବାଥ ମା କୁରୁ .. ୩..
ବିରାଗମୁପଯାତ୍ଯନ୍ତର୍ବାସନାସ୍ବନୁବାସରମ୍ .
କ୍ରିଯାସୂଦାରରୂପାସୁ କ୍ରମତେ ମୋଦତେଽନ୍ବହମ୍ .. ୪..
ଗ୍ରାମ୍ଯାସୁ ଜଡଚେଷ୍ଟାସୁ ସତତଂ ବିଚିକିତ୍ସତେ .
ନୋଦାହରତି ମର୍ମାଣି ପୁଣ୍ଯକର୍ମାଣି ସେବତେ .. ୫..
ଅନନ୍ଯୋଦ୍ବେଗକାରୀଣି ମୃଦୁକର୍ମାଣି ସେବତେ .
ପାପାଦ୍ବିଭେତି ସତତଂ ନ ଚ ଭୋଗମପେକ୍ଷତେ .. ୬..
ସ୍ନେହପ୍ରଣଯଗର୍ଭାଣି ପେଶଲାନ୍ଯୁଚିତାନି ଚ .
ଦେଶକାଲୋପପନ୍ନାନି ବଚନାନ୍ଯଭିଭାଷତେ .. ୭..
ମନସା କର୍ମଣା ବାଚା ସଜ୍ଜନାନୁପସେବତେ .
ଯତଃ କୁତଶ୍ଚିଦାନୀଯ ନିତ୍ଯଂ ଶାସ୍ତ୍ରାଣ୍ଯବେକ୍ଷତେ .. ୮..
ତଦାସୌ ପ୍ରଥମାମେକାଂ ପ୍ରାପ୍ତୋ ଭବତି ଭୂମିକାମ୍ .
ଏବଂ ବିଚାରବାନ୍ଯଃ ସ୍ଯାତ୍ସଂସାରୋତ୍ତରଣଂ ପ୍ରତି .. ୯..
ସ ଭୂମିକାବାନିତ୍ଯୁକ୍ତଃ ଶେଷସ୍ତ୍ବାର୍ଯ ଇତି ସ୍ମୃତଃ .
ବିଚାରନାମ୍ନୀମିତରାମାଗତୋ ଯୋଗଭୂମିକାମ୍ .. ୧୦..
ଶ୍ରୁତିସ୍ମୃତିସଦାଚାରଧାରଣାଧ୍ଯାନକର୍ମଣଃ .
ମୁଖ୍ଯଯା ବ୍ଯାଖ୍ଯଯାଖ୍ଯାତାଞ୍ଛ୍ରଯତି ଶ୍ରେଷ୍ଠପଣ୍ଡିତାନ୍ .. ୧୧..
ପଦାର୍ଥପ୍ରବିଭାଗଜ୍ଞଃ କାର୍ଯାକାର୍ଯବିନିର୍ଣଯମ୍ .
ଜାନାତ୍ଯଧିଗତଶ୍ଚାନ୍ଯୋ ଗୃହଂ ଗୃହପତିର୍ଯଥା .. ୧୨..
ମଦାଭିମାନମାତ୍ସର୍ଯଲୋଭମୋହାତିଶାଯିତାମ୍ .
ବହିରପ୍ଯାସ୍ଥିତାମୀଷତ୍ଯଜତ୍ଯହିରିବ ତ୍ବଚମ୍ .. ୧୩..
ଇତ୍ଥଂଭୂତମତିଃ ଶାସ୍ତ୍ରଗୁରୁସଜ୍ଜନସେବଯା .
ସରହସ୍ଯମଶେଷେଣ ଯଥାବଦଧିଗଚ୍ଛତି .. ୧୪..
ଅସଂସର୍ଗାଭିଧାମନ୍ଯାଂ ତୃତୀଯାଂ ଯୋଗଭୂମିକାମ୍ .
ତତଃ ପତତ୍ଯସୌ କାନ୍ତଃ ପୁଷ୍ପଶଯ୍ଯାମିବାମଲାମ୍ .. ୧୫..
ଯଥାବଚ୍ଛାସ୍ତ୍ରବାକ୍ଯାର୍ଥେ ମତିମାଧାଯ ନିଶ୍ଚଲାମ୍ .
ତାପସାଶ୍ରମବିଶ୍ରାନ୍ତୈରଧ୍ଯାତ୍ମକଥନକ୍ରମୈଃ .
ଶିଲାଶଯ୍ଯାସନାସୀନୋ ଜରଯତ୍ଯାଯୁରାତତମ୍ .. ୧୬..
ବନାବନିବିହାରେଣ ଚିତ୍ତୋପଶମଶୋଭିନା .
ଅସଙ୍ଗସୁଖସୌଖ୍ଯେନ କାଲଂ ନଯତି ନୀତିମାନ୍ .. ୧୭..
ଅଭ୍ଯାସାତ୍ସାଧୁଶାସ୍ତ୍ରାଣାଂ କରଣାତ୍ପୁଣ୍ଯକର୍ମଣାମ୍ .
ଜନ୍ତୋର୍ଯଥାବଦେବେଯଂ ବସ୍ତୁଦୃଷ୍ଟିଃ ପ୍ରସୀଦତି .. ୧୮..
ତୃତୀଯାଂ ଭୂମିକାଂ ପ୍ରାପ୍ଯ ବୁଦ୍ଧୋଽନୁଭବତି ସ୍ବଯମ୍ .. ୧୯..
ଦ୍ବିପ୍ରକାରସଂସର୍ଗଂ ତସ୍ଯ ଭେଦମିମଂ ଶ୍ରୁଣୁ .
ଦ୍ବିବିଧୋଽଯମସଂସର୍ଗଃ ସାମାନ୍ଯଃ ଶ୍ରେଷ୍ଠ ଏବ ଚ .. ୨୦..
ନାହଂ କର୍ତା ନ ଭୋକ୍ତା ଚ ନ ବାଧ୍ଯୋ ନ ଚ ବାଧକଃ .
ଇତ୍ଯସଂଜନମର୍ଥେଷୁ ସାମାନ୍ଯାସଙ୍ଗନାମକମ୍ .. ୨୧..
ପ୍ରାକ୍କର୍ମନିର୍ମିତଂ ସର୍ବମୀଶ୍ବରାଧୀନମେବ ବା .
ସୁଖଂ ବା ଯଦି ବା ଦୁଃଖଂ କୈବାତ୍ର ତବ କର୍ତୃତା .. ୨୨..
ଭୋଗାଭୋଗା ମହାରୋଗାଃ ସଂପଦଃ ପରମାପଦଃ .
ବିଯୋଗାଯୈବ ସଂଯୋଗା ଆଧଯୋ ବ୍ଯାଧଯୋ ଧିଯାମ୍ .. ୨୩..
କାଲଶ୍ଚ କଲନୋଦ୍ଯୁକ୍ତଃ ସର୍ବଭାବାନନାରତମ୍ .
ଅନାସ୍ଥଯେତି ଭାବାନାଂ ଯଦଭାବନମାନ୍ତରମ୍ .
ବାକ୍ଯାର୍ଥଲବ୍ଧମନସଃ ସମାନ୍ଯୋଽସାବସଙ୍ଗମଃ .. ୨୪..
ଅନେନ କ୍ରମଯୋଗେନ ସଂଯୋଗେନ ମହାତ୍ମନାମ୍ .
ନାହଂ କର୍ତେଶ୍ବରଃ କର୍ତା କର୍ମ ବା ପ୍ରାକ୍ତନଂ ମମ .. ୨୫..
କୃତ୍ବା ଦୂରତରେ ନୂନମିତି ଶବ୍ଦାର୍ଥଭାବନମ୍ .
ଯନ୍ମୌନମାସନଂ ଶାନ୍ତଂ ତଚ୍ଛ୍ରେଷ୍ଠାସଙ୍ଗ ଉଚ୍ଯତେ .. ୨୬..
ସନ୍ତୋଷାମୋଦମଧୁରା ପ୍ରଥମୋଦେତି ଭୂମିକା .
ଭୂମିପ୍ରୋଦିତମାତ୍ରୋଽନ୍ତରମୃତାଙ୍କୁରିକେବ ସା .. ୨୭..
ଏଷା ହି ପରିମୃଷ୍ଟାନ୍ତଃ ସଂନ୍ଯାସା ପ୍ରସବୈକଭୂଃ .
ଦ୍ବିତୀଯାଂ ଚ ତୃତୀଯାଂ ଚ ଭୂମିକାଂ ପ୍ରାପ୍ନୁଯାତ୍ତତଃ .. ୨୮..
ଶ୍ରେଷ୍ଠା ସର୍ବଗତା ହ୍ଯେଷା ତୃତୀଯା ଭୂମିକାତ୍ର ହି .
ଭବତି ପ୍ରୋଜ୍ଝିତାଶେଷସଂକଲ୍ପକଲନଃ ପୁମାନ୍ .. ୨୯..
ଭୂମିକାତ୍ରିତଯାଭ୍ଯାସାଦଜ୍ଞାନେ କ୍ଷଯମାଗତେ .
ସମଂ ସର୍ବତ୍ର ପଶ୍ଯନ୍ତି ଚତୁର୍ଥୀଂ ଭୂମିକାଂ ଗତାଃ .. ୩୦..
ଅଦ୍ବୈତେ ସ୍ଥୈର୍ଯମାଯାତେ ଦ୍ବୈତେ ଚ ପ୍ରଶମଂ ଗତେ .
ପଶ୍ଯନ୍ତି ସ୍ବପ୍ନବଲ୍ଲୋକଂ ଚତୁର୍ଥୀଂ ଭୂମିକାଂ ଗତାଃ .. ୩୧..
ଭୂମିକାତ୍ରିତଯଂ ଜାଗ୍ରଚ୍ଚତୁର୍ଥୀ ସ୍ବପ୍ନ ଉଚ୍ଯତେ .. ୩୨..
ଚିତ୍ତଂ ତୁ ଶରଦଭ୍ରାଂଶବିଲଯଂ ପ୍ରବିଲୀଯତେ .
ସତ୍ତ୍ବାବଶେଷ ଏବାସ୍ତେ ପଞ୍ଚମୀଂ ଭୂମିକାଂ ଗତଃ .. ୩୩..
ଜଗଦ୍ବିକଲ୍ପୋ ନୋଦେତି ଚିତ୍ତସ୍ଯାତ୍ର ବିଲାପନାତ୍ .
ପଞ୍ଚମୀଂ ଭୂମିକାମେତ୍ଯ ସୁଷୁପ୍ତପଦନାମିକାମ୍ .
ଶାନ୍ତାଶେଷବିଶେଷାଂଶସ୍ତିଷ୍ଠତ୍ଯଦ୍ବୈତମାତ୍ରକଃ .. ୩୪..
ଗଲିତଦ୍ବୈତନିର୍ଭାସୋ ମୁଦିତୋଽତଃପ୍ରବୋଧବାନ୍ .
ସୁଷୁପ୍ତମନ ଏବାସ୍ତେ ପଞ୍ଚମୀଂ ଭୂମିକାଂ ଗତଃ .. ୩୫..
ଅନ୍ତର୍ମୁଖତଯାତିଷ୍ଠନ୍ବହିର୍ବୃତ୍ତିପରୋଽପି ସନ୍ .
ପରିଶ୍ରାନ୍ତତଯା ନିତ୍ଯଂ ନିଦ୍ରାଲୁରିବ ଲକ୍ଷ୍ଯତେ .. ୩୬..
କୁର୍ବନ୍ନଭ୍ଯାସମେତସ୍ଯାଂ ଭୂମିକାଯାଂ ବିବାସନଃ .
ଷଷ୍ଠୀଂ ତୁର୍ଯାଭିଧାମନ୍ଯାଂ କ୍ରମାତ୍ପତତି ଭୂମିକାମ୍ .. ୩୭..
ଯତ୍ର ନାସନ୍ନସଦ୍ରୂପୋ ନାହଂ ନାପ୍ଯହଂକୃତିଃ .
କେବଲଂ କ୍ଷୀଣମନନମାସ୍ତେଽଦ୍ବୈତେଽତିନିର୍ଭଯଃ .. ୩୮..
ନିର୍ଗ୍ରନ୍ଥିଃ ଶାନ୍ତସନ୍ଦେହୋ ଜୀବନ୍ମୁକ୍ତୋ ବିଭାବନଃ .
ଅନିର୍ବାଣୋଽପି ନିର୍ବାଣଶ୍ଚିତ୍ରଦୀପ ଇବ ସ୍ଥିତଃ .. ୩୯..
ଷଷ୍ଠ୍ଯାଂ ଭୂମାବସୌ ସ୍ଥିତ୍ବା ସପ୍ତମୀଂ ଭୂମିମାପ୍ନୁଯାତ୍ .. ୪୦..
ବିଦେହମୁକ୍ତତାତ୍ରୋକ୍ତା ସପ୍ତମୀ ଯୋଗଭୂମିକା .
ଅଗମ୍ଯା ବଚସାଂ ଶାନ୍ତା ସା ସୀମା ସର୍ବଭୂମିଷୁ .. ୪୧..
ଲୋକାନୁବର୍ତନଂ ତ୍ଯକ୍ତ୍ବା ତ୍ଯକ୍ତ୍ବା ଦେହାନୁବର୍ତନମ୍ .
ଶାସ୍ତ୍ରାନୁବର୍ତନଂ ତ୍ଯକ୍ତ୍ବା ସ୍ବାଧ୍ଯାସାପନଯଂ କୁରୁ .. ୪୨..
ଓଙ୍କାରମାତ୍ରମଖିଲଂ ବିଶ୍ବପ୍ରାଜ୍ଞାଦିଲକ୍ଷଣମ୍ .
ବାଚ୍ଯବାଚ୍ଯକତାଭେଦାଭେଦେନାନୁପଲବ୍ଧିତଃ .. ୪୩..
ଅକାରମାତ୍ରଂ ବିଶ୍ବଃ ସ୍ଯାଦୁକାରତୈଜସଃ ସ୍ମୃତଃ .
ପ୍ରାଜ୍ଞୋ ମକାର ଇତ୍ଯେବଂ ପରିପଶ୍ଯେତ୍କ୍ରମେଣ ତୁ .. ୪୪..
ସମାଧିକାଲାତ୍ପ୍ରାଗେବ ବିଚିନ୍ତ୍ଯାତିପ୍ରଯତ୍ନତଃ .
ସ୍ଥୁଲସୂକ୍ଷ୍ମକ୍ରମାତ୍ସର୍ବଂ ଚିଦାତ୍ମନି ବିଲାପଯେତ୍ .. ୪୫..
ଚିଦାତ୍ମାନଂ ନିତ୍ଯଶୁଦ୍ଧବୁଦ୍ଧମୁକ୍ତସଦଦ୍ବଯଃ .
ପରମାନନ୍ଦସନ୍ଦେହୋ ବାସୁଦେବୋଽହଓମିତି .. ୪୬..
ଆଦିମଧ୍ଯାବସାନେଷୁ ଦୁଃଖଂ ସର୍ବମିଦଂ ଯତଃ .
ତସ୍ମାତ୍ସର୍ବଂ ପରିତ୍ଯଜ୍ଯ ତତ୍ତ୍ବନିଷ୍ଠୋ ଭବାନଘ .. ୪୭..
ଅବିଦ୍ଯାତିମିରାତୀତଂ ସର୍ବାଭାସବିବର୍ଜିତମ୍ .
ଆନନ୍ଦମମଲଂ ଶୁଦ୍ଧଂ ମନୋବାଚାମଗୋଚରମ୍ .. ୪୮..
ପ୍ରଜ୍ଞାନଘନମାନନ୍ଦଂ ବ୍ରହ୍ମାସ୍ମୀତି ବିଭାବଯେତ୍ .. ୪୯..
ଇତ୍ଯୁପନିଷତ୍ ..
୐ ସହ ନାବବତୁ . ସହ ନୌ ଭୁନକ୍ତୁ . ସହ ବୀର୍ଯଂ କରବାବହୈ .
ତେଜସ୍ବିନାବଧୀତମସ୍ତୁ ମା ବିଦ୍ବିଷାବହୈ ..
୐ ଶାନ୍ତିଃ ଶାନ୍ତିଃ ଶାନ୍ତିଃ ..
ହରିଃ ୐ ତତ୍ସତ୍ ..
ଇତ୍ଯଲକ୍ଷ୍ଯୁପନିଷତ୍ ..

Encoded by Sunder Hattangadi (sunderh@hotmail.com)

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com