.. ଅନ୍ନପୂର୍ଣୋପନିଷତ୍ ..
ସର୍ବାପହ୍ନବସଂସିଦ୍ଧବ୍ରହ୍ମମାତ୍ରତଯୋଜ୍ଜ୍ବଲମ୍ .
ତ୍ରୈପଦଂ ଶ୍ରୀରାମତତ୍ତ୍ବଂ ସ୍ବମାତ୍ରମିତି ଭାବଯେ ..
୐ ଭଦ୍ରଂ କର୍ଣେଭିଃ ଶୃଣୁଯାମ ଦେବାଃ .. ଭଦ୍ରଂ ପଶ୍ଯେମାକ୍ଷଭିର୍ଯଜତ୍ରାଃ ..
ସ୍ଥିରୈରଙ୍ଗୈସ୍ତୁଷ୍ଟୁବାଁସସ୍ତନୂଭିଃ .. ବ୍ଯଶେମ ଦେବହିତଂ ଯଦାଯୁଃ ..
ସ୍ବସ୍ତି ନ ଇନ୍ଦ୍ରୋ ବୃଦ୍ଧଶ୍ରବାଃ .. ସ୍ବସ୍ତି ନଃ ପୂଷା ବିଶ୍ବବେଦାଃ ..
ସ୍ବସ୍ତି ନସ୍ତାର୍କ୍ଷ୍ଯୋ ଅରିଷ୍ଟନେମିଃ .. ସ୍ବସ୍ତି ନୋ ବୃହସ୍ପତିର୍ଦଧାତୁ ..
୐ ଶାନ୍ତିଃ ଶାନ୍ତିଃ ଶାନ୍ତିଃ ..
ହରିଃ ୐ ନିଦାଘୋ ନାମ ଯୋଗୀନ୍ଦ୍ର ଋଭୁଂ ବ୍ରହ୍ମବିଦାଂ ବରମ୍ .
ପ୍ରଣମ୍ଯ ଦଣ୍ଡବଦ୍ଭୂମାବୁତ୍ଥାଯ ସ ପୁନର୍ମୁନିଃ .. ୧..
ଆତ୍ମତତ୍ତ୍ବମନୁବ୍ରୂହୀତ୍ଯେବଂ ପପ୍ରଚ୍ଛ ସାଦରମ୍ .
କଯୋପାସନଯା ବ୍ରହ୍ମନ୍ନୀଦୃଶଂ ପ୍ରାପ୍ତବାନସି .. ୨..
ତାଂ ମେ ବ୍ରୂହି ମହାବିଦ୍ଯାଂ ମୋକ୍ଷସାମ୍ରାଜ୍ଯଦାଯିନୀମ୍ .
ନିଦାଘ ତ୍ବଂ କୃତାର୍ଥୋଽସି ଶୃଣୁ ବିଦ୍ଯାଂ ସନାତନୀମ୍ .. ୩..
ଯସ୍ଯା ବିଜ୍ଞାନମାତ୍ରେଣ ଜୀବନ୍ମୁକ୍ତୋ ଭବିଷ୍ଯସି .
ମୂଲଶୃଙ୍ଗାଟମଧ୍ଯସ୍ଥା ବିନ୍ଦୁନାଦକଲାଶ୍ରଯା .. ୪..
ନିତ୍ଯାନନ୍ଦା ନିରାଧାରା ବିଖ୍ଯାତା ବିଲସତ୍କଚା .
ବିଷ୍ଟପେଶୀ ମହାଲକ୍ଷ୍ମୀଃ କାମସ୍ତାରୋ ନତିସ୍ତଥା .. ୫..
ଭଗବତ୍ଯନ୍ନପୂର୍ଣେତି ମମାଭିଲଷିତଂ ତତଃ .
ଅନ୍ନଂ ଦେହି ତତଃ ସ୍ବାହା ମନ୍ତ୍ରସାରେତି ବିଶ୍ରୁତା .. ୬..
ସପ୍ତବିଂଶତି ବର୍ଣାତ୍ମା ଯୋଗିନୀଗଣସେବିତା .. ୭..
ଐଂ ହ୍ରୀଂ ସୌଂ ଶ୍ରୀଂ କ୍ଲୀମୋନ୍ନମୋ ଭଗବତ୍ଯନ୍ନପୂର୍ଣେ
ମମାଭିଲଷିତମନ୍ନଂ ଦେହି ସ୍ବାହା .
ଇତି ପିତ୍ରୋପଦିଷ୍ଟୋଽସ୍ମି ତଦାଦିନିଯମଃ ସ୍ଥିତଃ .
କୃତବାନ୍ସ୍ବାଶ୍ରମାଚାରୋ ମନ୍ତ୍ରାନୁଷ୍ଠାନମନ୍ବହମ୍ .. ୮..
ଏବଂ ଗତେ ବହୁଦିନେ ପ୍ରାଦୁରାସୀନ୍ମମାଗ୍ରତଃ .
ଅନ୍ନପୂର୍ଣା ବିଶାଲାକ୍ଷୀ ସ୍ମଯମାନମୁଖାମ୍ବୁଜା .. ୯..
ତାଂ ଦୃଷ୍ଟ୍ବା ଦଣ୍ଡବଦ୍ଭୂମୌ ନତ୍ବା ପ୍ରାଞ୍ଜଲିରାସ୍ଥିତଃ .
ଅହୋ ବତ୍ସ କୃତାର୍ଥୋଽସି ବରଂ ବରଯ ମା ଚିରମ୍ .. ୧୦..
ଏବମୁକ୍ତୋ ବିଶାଲାକ୍ଷ୍ଯା ମଯୋକ୍ତଂ ମୁନିପୁଙ୍ଗବ .
ଆତ୍ମତତ୍ତ୍ବଂ ମନସି ମେ ପ୍ରାଦୁର୍ଭବତୁ ପାର୍ବତି .. ୧୧..
ତଥୈବାସ୍ଥିତି ମାମୁକ୍ତ୍ବା ତତ୍ରୈବାନ୍ତରଧୀଯତ .
ତଦା ମେ ମତିରୁତ୍ପନ୍ନା ଜଗଦ୍ବୈଚିତ୍ର୍ଯଦର୍ଶନାତ୍ .. ୧୨..
ଭ୍ରମଃ ପଞ୍ଚବିଧୋ ଭାତି ତଦେବେହ ସମୁଚ୍ଯତେ .
ଜୀବେଶ୍ବରୌ ଭିନ୍ନରୂପାବିତି ପ୍ରାଥମିକୋ ଭ୍ରମଃ .. ୧୨..
ଆତ୍ମନିଷ୍ଠଂ କର୍ତୃଗୁଣଂ ବାସ୍ତବଂ ବା ଦ୍ବିତୀଯକଃ .
ଶରୀରତ୍ରଯସଂଯୁକ୍ତଜୀବଃ ସଙ୍ଗୀ ତୃତୀଯକଃ .. ୧୩..
ଜଗତ୍କାରଣରୂପସ୍ଯ ବିକାରିତ୍ବଂ ଚତୁର୍ଥକଃ .
କାରଣାଦ୍ଭିନ୍ନଜଗତଃ ସତ୍ଯତ୍ବଂ ପଞ୍ଚମୋ ଭ୍ରମଃ .
ପଞ୍ଚଭ୍ରମନିବୃତ୍ତିଶ୍ଚ ତଦା ସ୍ଫୁରତି ଚେତସି .. ୧୫..
ବିମ୍ବପ୍ରତିବିମ୍ବଦର୍ଶନେନ ଭେଦଭ୍ରମୋ ନିବୃତ୍ତଃ .
ସ୍ଫଟିକଲୋହିତଦର୍ଶନେନ ପାରମାର୍ଥିକକର୍ତୃତ୍ବଭ୍ରମୋ ନିବୃତ୍ତଃ .
ଘଟମଠାକାଶଦର୍ଶନେନ ସଙ୍ଗୀତିଭ୍ରମୋ ନିବୃତ୍ତଃ .
ରଜ୍ଜୁସର୍ପଦର୍ଶନେନ କାରଣାଦ୍ଭିନ୍ନଜଗତଃ ସତ୍ଯତ୍ବଭ୍ରମୋ ନିବୃତ୍ତଃ .
କନକରୁଚକଦର୍ଶନେନ ବିକାରିତ୍ବଭ୍ରମୋ ନିବୃତ୍ତଃ .
ତଦାପ୍ରଭୃତି ମଚ୍ଚିତ୍ତଂ ବ୍ରହ୍ମାକାରମଭୂତ୍ସ୍ବଯମ୍ .
ନିଦାଘ ତ୍ବମପୀତ୍ଥଂ ହି ତତ୍ତ୍ବଜ୍ଞାନମବାପ୍ନୁହି .. ୧୬..
ନିଦାଘଃ ପ୍ରଣତୋ ଭୂତ୍ବା ଋଭୁଂ ପପ୍ରଚ୍ଛ ସାଦରମ୍ .
ବ୍ରୂହି ମେ ଶ୍ରଦ୍ଦଧାନାଯ ବ୍ରହ୍ମବିଦ୍ଯାମନୁତ୍ତମାମ୍ .. ୧୭..
ତଥେତ୍ଯାହ ଋଭୁଃ ପ୍ରୀତସ୍ତତ୍ତ୍ବଜ୍ଞାଂ ବଦାମି ତେ .
ମହାକର୍ତା ମହାଭୋକ୍ତା ମହାତ୍ଯାଗୀ ଭବାନଘ .
ସ୍ବସ୍ବରୂପାନୁସନ୍ଧାନମେବଂ କୃତ୍ବା ସୁଖୀ ଭବ .. ୧୮..
ନିତ୍ଯୋଦିତଂ ବିମଲମାଦ୍ଯମନତରୂପଂ
     ବ୍ରହ୍ମାସ୍ମି ନେତରକଲାକଲନଂ ହି କିଂଚିତ୍ .
ଇତ୍ଯେବ ଭାବଯ ନିରଞ୍ଜନତାମୁପେତୋ
     ନିର୍ବାଣମେହି ସକଲାମଲଶାନ୍ତବୃତ୍ତିଃ .. ୧୯..
ଯଦିଦଂ ଦୃଶ୍ଯତେ କିଂଚିତ୍ତତ୍ତନ୍ନାସ୍ତୀତି ଭାବଯ .
ଯଥା ଗନ୍ଧର୍ବନଗରଂ ଯଥା ବାରି ମରୁସ୍ଥଲେ .. ୨୦..
ଯତ୍ତୁ ନୋ ଦୃଶ୍ଯତେ କିଂଚିଦ୍ଯନ୍ନୁ କିଂଚିଦିବ ସ୍ଥିତମ୍ .
ମନଃଷଷ୍ଠେନ୍ଦ୍ରିଯାତୀତଂ ତନ୍ମଯୋ ଭବ ବୈ ମୁନେ .. ୨୧..
ଅବିନାଶି ଚିଦାକାଶଂ ସର୍ବାତ୍ମକମଖଣ୍ଡିତମ୍ .
ନୀରନ୍ଧ୍ରଂ ଭୂରିବାଶେଷଂ ତଦସ୍ମୀତି ବିଭାବଯ .. ୨୨..
ଯଦା ସଂକ୍ଷୀଯତେ ଚିତ୍ତମଭାବାତ୍ଯନ୍ତଭାବନାତ୍ .
ଚିତ୍ସାମାନ୍ଯସ୍ବରୂପସ୍ଯ ସତ୍ତାସାମାନ୍ଯତା ତଦା .. ୨୩..
ନୂନଂ ଚୈତ୍ଯାଂଶରହିତା ଚିଦ୍ଯଦାତ୍ମନି ଲୀଯତେ .
ଅସଦ୍ରୂପବଦତ୍ଯଚ୍ଛା ସତ୍ତାସାମାନ୍ଯତା ତଦା .. ୨୪..
ଦୃଷ୍ଟିରେଷା ହି ପରମା ସଦେହାଦେହଯୋଃ ସମା .
ମୁକ୍ତଯୋଃ ସଂଭବତ୍ଯେବ ତୁର୍ଯାତୀତପଦାଭିଧା .. ୨୫..
ବ୍ଯୁତ୍ଥିତସ୍ଯ ଭବତ୍ଯେଷା ସମାଧିସ୍ଥସ୍ଯ ଚାନଘ .
ଜ୍ଞସ୍ଯ କେବଲମଜ୍ଞସ୍ଯ ନ ଭବତ୍ଯେବ ବୋଧଜା .
ଅନାନନ୍ଦସମାନନ୍ଦମୁଗ୍ଧମୁଗ୍ଧମୁଖଦ୍ଯୁତିଃ .. ୨୬..
ଚିରକାଲପରିକ୍ଷୀଣମନନାଦିପରିଭ୍ରମଃ .
ପଦମାସାଦ୍ଯତେ ପୁଣ୍ଯଂ ପ୍ରଜ୍ଞଯୈବୈକଯା ତଥା .. ୨୭..
ଇମଂ ଗୁଣସମାହାରମନାତ୍ମତ୍ବେନ ପଶ୍ଯତଃ .
ଅନ୍ତଃଶୀତଲଯା ଯାସୌ ସମାଧିରିତି କଥ୍ଯତେ .. ୨୮..
ଅବାସନଂ ସ୍ଥିରଂ ପ୍ରୋକ୍ତଂ ମନୋଧ୍ଯାନଂ ତଦେବ ଚ .
ତଦେବ କେବଲୀଭାନଂ ଶାନ୍ତତୈବ ଚ ତତ୍ସଦା .. ୨୯..
ତନୁବାସନମତ୍ଯୁଚ୍ଚୈଃ ପଦାଯୋଦ୍ଯତମୁଚ୍ଯତେ .
ଅବାସଗଂ ମନୋଽକର୍ତୃପଦଂ ତସ୍ମାଦବାପ୍ଯତେ .. ୩୦..
ଘନବାସନମେତତ୍ତୁ ଚେତଃକର୍ତୃତ୍ବଭାବନମ୍ .
ସର୍ବଦୁଃଖପ୍ରଦଂ ତସ୍ମାଦ୍ବାସନାଂ ତନୁତାଂ ନଯେତ୍ .. ୩୧..
ଚେତସା ସଂପରିତ୍ଯଜ୍ଯ ସର୍ବଭାବାତ୍ମଭାବନାମ୍ .
ସର୍ବମାକାଶତାମେତି ନିତ୍ଯମନ୍ତର୍ମୁଖସ୍ଥିତେଃ .. ୩୨..
ଯଥା ବିପଣଗା ଲୋକା ବିହରନ୍ତୋଽପ୍ଯସତ୍ସମାଃ .
ଅସଂବନ୍ଧାତ୍ତଥା ଜ୍ଞସ୍ଯ ଗ୍ରାମୋଽପି ବିପିନୋପମଃ .. ୩୩..
ଅନ୍ତର୍ମୁଖତଯା ନିତ୍ଯଂ ସୁପ୍ତୋ ବୁଦ୍ଧୋ ବ୍ରଜନ୍ପଠନ୍ .
ପୁରଂ ଜନପଦଂ ଗ୍ରାମମରଣ୍ଯମିବ ପଶ୍ଯତି .. ୩୪..
ଅନ୍ତଃଶୀତଲତାଯାଂ ତୁ ଲବ୍ଧାଯାଂ ଶୀତଲଂ ଜଗତ୍ .
ଅନ୍ତସ୍ତୃଷ୍ଣୋପତପ୍ତାନାଂ ଦାବଦାହମଯଂ ଜଗତ୍ .. ୩୫..
ଭବତ୍ଯଖିଲଜନ୍ତୂନାଂ ଯଦନ୍ତସ୍ତଦ୍ବହିଃ ସ୍ଥିତମ୍ .. ୩୬..
ଯସ୍ତ୍ବାତ୍ମରତିରେବାନ୍ତଃ କୁର୍ବନ୍କର୍ମେନ୍ଦ୍ରିଯୈଃ କ୍ରିଯାଃ .
ନ ବଶୋ ହର୍ଷଶୋକାଭ୍ଯାଂ ସ ସମାହିତ ଉଚ୍ଯତେ .. ୩୭..
ଆତ୍ମବତ୍ସର୍ବଭୂତାନି ପରଦ୍ରବ୍ଯାଣି ଲୋଷ୍ଠବତ୍ .
ସ୍ବଭାବାଦେବ ନ ଭଯାଦ୍ଯଃ ପଶ୍ଯତି ସ ପଶ୍ଯତି .. ୩୮..
ଅଦ୍ଯୈବ ମୃତିରାଯାତୁ କଲ୍ପାନ୍ତନିଚଯେନ ବା .
ନାସୌ କଲଙ୍କମାପ୍ନୋତି ହେମ ପଙ୍କଗତଂ ଯଥା .. ୩୯..
କୋଽହଂ କଥମିଦଂ କିଂ ବା କଥଂ ମରଣଜନ୍ମନୀ .
ବିଚାରଯାନ୍ତରେ ବେତ୍ଥଂ ମହତ୍ତତ୍ଫଲମେଷ୍ଯସି .. ୪୦..
ବିଚାରେଣ ପରିଜ୍ଞାତସ୍ବଭାବସ୍ଯ ସତସ୍ତବ .
ମନଃ ସ୍ବରୂପମୁତ୍ସୃଜ୍ଯ ଶମମେଷ୍ଯତି ବିଜ୍ବରମ୍ .. ୪୧..
ବିଜ୍ବରତ୍ବଂ ଗତଂ ଚେତସ୍ତବ ସଂସାରବୃତ୍ତିଷୁ .
ନ ନିମଜ୍ଜତି ତଦ୍ବ୍ରହ୍ମନ୍ଗୋଷ୍ପଦେଷ୍ବିବ ବାରଣଃ .. ୪୨..
କୃପଣଂ ତୁ ମନୋ ବ୍ରହ୍ମନ୍ଗୋଷ୍ପଦେଽପି ନିମଜ୍ଜତି .
କାର୍ଯେ ଗୋଷ୍ପଦତୋଯେଽପି ବିଶୀର୍ଣୋ ମଶକୋ ଯଥା .. ୪୩..
ଯାବଦ୍ଯାବନ୍ମୁନିଶ୍ରେଷ୍ଠ ସ୍ବଯଂ ସଂତଜ୍ଯତେଽଖିଲମ୍ .
ତାବତ୍ତାବତ୍ପରାଲୋକଃ ପରମାତ୍ମୈବ ଶିଷ୍ଯତେ .. ୪୪..
ଯାବତ୍ସର୍ବଂ ନ ସଂତ୍ଯକ୍ତଂ ତାବଦାତ୍ମା ନ ଲଭ୍ଯତେ .
ସର୍ବବସ୍ତୁପରିତ୍ଯାଗେ ଶେଷ ଆତ୍ମେତି କଥ୍ଯତେ .. ୪୫..
ଆତ୍ମାବଲୋକନାର୍ଥଂ ତୁ ତସ୍ମାତ୍ସର୍ବଂ ପରିତ୍ଯଜେତ୍ .
ସର୍ବଂ ସଂତ୍ଯଜ୍ଯ ଦୂରେଣ ଯଚ୍ଛିଷ୍ଟଂ ତନ୍ମଯୋ ଭବ .. ୪୬..
ସର୍ବଂ କିଂଚିଦିଦଂ ଦୃଶ୍ଯଂ ଦୃଶ୍ଯତେ ଯଜ୍ଜଗଦ୍ଗତମ୍ .
ଚିନ୍ନିଷ୍ପନ୍ଦାଂଶମାତ୍ରଂ ତନ୍ନାନ୍ଯତ୍କିଂଚନ ଶାଶ୍ବତମ୍ .. ୪୭..
ସମାହିତା ନିତ୍ଯତୃପ୍ତା ଯଥାଭୂତାର୍ଥଦର୍ଶିନୀ .
ବ୍ରହ୍ମନ୍ସମାଧିଶବ୍ଦେନ ପରା ପ୍ରଜ୍ଞୋଚ୍ଯତେ ବୁଧୈଃ .. ୪୮..
ଅକ୍ଷୁବ୍ଧା ନିରହଂକାରା ଦ୍ବନ୍ଦ୍ବେଷ୍ବନନୁପାତିନୀ .
ପ୍ରୋକ୍ତା ସମାଧିଶବ୍ଦେନ ମେରୋଃ ସ୍ଥିରତରା ସ୍ଥିତିଃ .. ୪୯..
ନିଶ୍ଚିତା ବିଗତାଭୀଷ୍ଟା ହେଯୋପଦେଯବର୍ଜିତା .
ବ୍ରହ୍ମନ୍ସମାଧିଶବ୍ଦେନ ପରିପୂର୍ଣା ମନୋଗତିଃ .. ୫୦..
କେବଲଂ ଚିତ୍ପ୍ରକାଶାଂଶକଲ୍ପିତା ସ୍ଥିରତାଂ ଗତା .
ତୁର୍ଯା ସା ପ୍ରାପ୍ଯତେ ଦୃଷ୍ଟିର୍ମହଦ୍ଭିର୍ବେଦବିତ୍ତମୈଃ .. ୫୧..
ଅଦୂରଗତସାଦୃଶ୍ଯା ସୁଷୁପ୍ତସ୍ଯୋପଲକ୍ଷ୍ଯତେ .
ମନୋହଂକାରବିଲଯେ ସର୍ବଭାବାନ୍ତରସ୍ଥିତା .. ୫୨..
ସମୁଦେତି ପରାନନ୍ଦା ଯା ତନୁଃ ପାରମେଶ୍ବରୀ .
ମନସୈବ ମନଶ୍ଛିତ୍ତ୍ବା ସା ସ୍ବଯଂ ଲଭ୍ଯତେ ଗତିଃ .. ୫୩..
ତଦନୁ ବିଷଯବାସନାବିନାଶ- 
     ସ୍ତଦନୁ ଶୁଭଃ ପରମଃ ସ୍ଫୁଟପ୍ରକାଶଃ .
ତଦନୁ ଚ ସମତାବଶାତ୍ସ୍ବରୂପେ
     ପରିଣମନଂ ମହତାମଚିନ୍ତ୍ଯରୂପମ୍ .. ୫୪..
ଅଖିଲମିଦମନନ୍ତମନନ୍ତମାତ୍ମତତ୍ତ୍ବଂ
     ଦୃଢପରିଣାମିନି ଚେତସି ସ୍ଥିତୋଽନ୍ତଃ .
ବହିରୁପଶମିତେ ଚରାଚରାତ୍ମା
     ସ୍ବଯମନୁଭୂଯତ ଏବ ଦେବଦେବଃ .. ୫୫..
ଅସକ୍ତଂ ନିର୍ମଲଂ ଚିତ୍ତଂ ଯୁକ୍ତଂ ସଂସାର୍ଯବିସ୍ଫୁଟମ୍ .
ସକ୍ତଂ ତୁ ଦୀର୍ଘତପସା ମୁକ୍ତମପ୍ଯତିବଦ୍ଧବତ୍ .. ୫୬..
ଅନ୍ତଃସଂସକ୍ତିନିର୍ମୁକ୍ତୋ ଜୀବୋ ମଧୁରବୃତ୍ତିମାନ୍ .
ବହିଃ କୁର୍ବନ୍ନକୁର୍ବନ୍ବା କର୍ତା ଭୋକ୍ତା ନ ହି କ୍ବଚିତ୍ .. ୫୭..
ଇତି ପ୍ରଥମୋଽଧ୍ଯାଯଃ .. ୧..
ନିଦାଘ ଉବାଚ ..
ସଙ୍ଗଃ କୀଦୃଶ ଇତ୍ଯୁକ୍ତଃ କଶ୍ଚ ବନ୍ଧାଯ ଦେହିନାମ୍ .
କଶ୍ଚ ମୋକ୍ଷାଯ କଥିତଃ କଥଂ ତ୍ବେଷ ଚିକିତ୍ସ୍ଯତେ .. ୧..
ଦେହଦେହିବିଭାଗୈକପରିତ୍ଯାଗେନ ଭାବନା .
ଦେହମାତ୍ରେ ହି ବିଶ୍ବାସଃ ସଙ୍ଗୋ ବନ୍ଧାଯ କଥ୍ଯତେ .. ୨..
ସର୍ବମାତ୍ମେଦମତ୍ରାହଂ କିଂ ବାଞ୍ଛାମି ତ୍ଯଜାମି କିମ୍ .
ଇତ୍ଯସଙ୍ଗସ୍ଥିତିଂ ବିଦ୍ଧି ଜୀବନ୍ମୁକ୍ତତନୁସ୍ଥିତାମ୍ .. ୩..
ନାହମସ୍ମି ନ ଚାନ୍ଯୋସ୍ତି ନ ଚାଯଂ ନ ଚ ନେତରଃ .
ସୋଽସଙ୍ଗ ଇତି ସଂପ୍ରୋକ୍ତୋ ବ୍ରହ୍ମାସ୍ମୀତ୍ଯେବ ସର୍ବଦା .. ୪..
ନାଭିନନ୍ଦତି ନୈଷ୍କର୍ମ୍ଯଂ ନ କର୍ମସ୍ବନୁଷଜ୍ଜତେ .
ସୁସମୋ ଯଃ ପରିତ୍ଯାଗୀ ସୋଽସଂସକ୍ତ ଇତି ସ୍ମୃତଃ .. ୫..
ସର୍ବକର୍ମଫଲାଦୀନାଂ ମନସୈବ ନ କର୍ମଣା .
ନିପୁଣୋ ଯଃ ପରିତ୍ଯାଗୀ ସୋଽସଂସକ୍ତ ଇତି ସ୍ମୃତଃ .. ୬..
ଅସଂକଲ୍ପେନ ସକଲାଶ୍ଚେଷ୍ଟା ନାନା ବିଜୃଂଭିତାଃ .
ଚିକିତ୍ସିତା ଭବନ୍ତୀହ ଶ୍ରେଯଃ ସଂପାଦଯନ୍ତି ହି .. ୭..
ନ ସକ୍ତମିହ ଚେଷ୍ଟାସୁ ନ ଚିନ୍ତାସୁ ନ ବସ୍ତୁଷୁ .
ନ ଗମାଗମଚେଷ୍ଟାସୁ ନ କାଲକଲନାସୁ ଚ .. ୮..
କେବଲଂ ଚିତି ବିଶ୍ରମ୍ଯ କିଂଚିଚ୍ଚୈତ୍ଯାବଲଂବ୍ଯପି .
ସର୍ବତ୍ର ନୀରସମିହ ତିଷ୍ଠତ୍ଯାତ୍ମରସଂ ମନଃ .. ୯..
ବ୍ଯବହାରମିଦଂ ସର୍ବଂ ମା କରୋତୁ କରୋତୁ ବା .
ଅକୁର୍ବନ୍ବାପି କୁର୍ବନ୍ବା ଜୀବଃ ସ୍ବାତ୍ମରତିକ୍ରିଯଃ .. ୧୦..
ଅଥବା ତମପି ତ୍ଯକ୍ତ୍ବା ଚୈତ୍ଯାଂଶଂ ଶାନ୍ତଚିଦ୍ଘନଃ .
ଜୀବସ୍ତିଷ୍ଠତି ସଂଶାନ୍ତୋ ଜ୍ବଲନ୍ମଣିରିବାତ୍ମନି .. ୧୧..
ଚିତ୍ତେ ଚୈତ୍ଯଦଶାହୀନେ ଯା ସ୍ଥିତିଃ କ୍ଷୀଣଚେତସାମ୍ .
ସୋଚ୍ଯତେ ଶାନ୍ତକଲନା ଜାଗ୍ରତ୍ଯେବ ସୁଷୁପ୍ତତା .. ୧୨..
ଏଷା ନିଦାଘ ସୌଷୁପ୍ତସ୍ଥିତିରଭ୍ଯାସଯୋଗତଃ .
ପ୍ରୌଢା ସତୀ ତୁରୀଯେତି କଥିତା ତତ୍ତ୍ବକୋବିଦୈଃ .. ୧୩..
ଅସ୍ଯାଂ ତୁରୀଯାବସ୍ଥାଯାଂ ସ୍ଥିତିଂ ପ୍ରାପ୍ଯାବିନାଶିନୀମ୍ .
ଆନନ୍ଦୈକାନ୍ତଶୀଲତ୍ବାଦନାନନ୍ଦପଦଂ ଗତଃ .. ୧୪..
ଅନାନନ୍ଦମହାନନ୍ଦକାଲାତୀତସ୍ତତୋଽପି ହି .
ମୁକ୍ତ ଇତ୍ଯୁଚ୍ଯତେ ଯୋଗୀ ତୁର୍ଯାତୀତପଦଂ ଗତଃ .. ୧୫..
ପରିଗଲିତସମସ୍ତଜନ୍ମପାଶଃ
     ସକଲବିଲୀନତମୋମଯାଭିମାନଃ .
ପରମରସମଯୀଂ ପରାତ୍ମସତ୍ତାଂ
     ଜଲଗତସୈନ୍ଧବଖଣ୍ଡବନ୍ମହାତ୍ମା .. ୧୬..
ଜଡାଜଡଦୃଶୋର୍ମଧ୍ଯେ ଯତ୍ତତ୍ତ୍ବଂ ପାରମାର୍ଥିକମ୍ .
ଅନୁଭୂତିମଯଂ ତସ୍ମାତ୍ସାରଂ ବ୍ରହ୍ମେତି କଥ୍ଯତେ .. ୧୭..
ଦୃଶ୍ଯସଂବଲିତୋ ବନ୍ଧସ୍ତନ୍ମୁକ୍ତୌ ମୁକ୍ତିରୁଚ୍ଯତେ .
ଦ୍ରବ୍ଯଦର୍ଶନସଂବନ୍ଧେ ଯାନୁଭୂତିରନାମଯା .. ୧୮..
ତାମବଷ୍ଟଭ୍ଯ ତିଷ୍ଠ ତ୍ବଂ ସୌଷୁପ୍ତୀଂ ଭଜତେ ସ୍ଥିତିମ୍ .
ସୈବ ତୁର୍ଯତ୍ବମାପ୍ନୋତି ତସ୍ଯାଂ ଦୃଷ୍ଟିଂ ସ୍ଥିରାଂ କୁରୁ .. ୧୯..
ଆତ୍ମା ସ୍ଥୂଲୋ ନ ଚୈବାଣୁର୍ନ ପ୍ରତ୍ଯକ୍ଷୋ ନ ଚେତରଃ .
ନ ଚେତନୋ ନ ଚ ଜଡୋ ନ ଚୈବାସନ୍ନ ସନ୍ମଯଃ .. ୨୦..
ନାହଂ ନାନ୍ଯୋ ନ ଚୈବୈକୋ ନ ଚାନେକୋଽଦ୍ବଯୋଽବ୍ଯଯଃ .
ଯଦୀଦଂ ଦୃଶ୍ଯତାଂ ପ୍ରାପ୍ତଂ ମନଃ ସର୍ବେନ୍ଦ୍ରିଯାସ୍ପଦମ୍ .. ୨୧..
ଦୃଶ୍ଯଦର୍ଶନସଂବନ୍ଧେ ଯତ୍ସୁଖଂ ପାରମାର୍ଥିକମ୍ .
ତଦତୀତଂ ପଦଂ ଯସ୍ମାତ୍ତନ୍ନ କିଂଚିଦିବୈବ ତତ୍ .. ୨୨..
ନ ମୋକ୍ଷୋ ନଭସଃ ପୃଷ୍ଠେ ନ ପାତାଲେ ନ ଭୂତଲେ .
ସର୍ବାଶାସଂକ୍ଷଯେ ଚେତଃକ୍ଷଯୋ ମୋକ୍ଷ ଇତୀଷ୍ଯତେ .. ୨୩..
ମୋକ୍ଷୋ ମେଽସ୍ତ୍ବିତି ଚିନ୍ତାନ୍ତର୍ଜାତା ଚେଦୁତ୍ଥିତଂ ମନଃ .
ମନନୋତ୍ଥେ ମନସ୍ଯୈଷ ବନ୍ଧଃ ସାଂସାରିକୋ ଦୃଢଃ .. ୨୪..
ଆତ୍ମନ୍ଯତୀତେ ସର୍ବସ୍ମାତ୍ସର୍ବରୂପେଽଥ ବା ତତେ .
କୋ ବନ୍ଧଃ କଶ୍ଚ ବା ମୋକ୍ଷୋ ନିର୍ମୂଲଂ ମନନଂ କୁରୁ .. ୨୫..
ଅଧ୍ଯାତ୍ମରତିରାଶାନ୍ତଃ ପୂର୍ଣପାବନମାନସଃ .
ପ୍ରାପ୍ତାନୁତ୍ତମବିଶ୍ରାନ୍ତିର୍ନ କିଂଚିଦିହ ବାଞ୍ଛତି .. ୨୬..
ସର୍ବାଧିଷ୍ଠାନସନ୍ମାତ୍ରେ ନିର୍ବିକଲ୍ପେ ଚିଦାତ୍ମନି .
ଯୋ ଜୀବତି ଗତସ୍ନେହଃ ସ ଜୀବନ୍ମୁକ୍ତ ଉଚ୍ଯତେ .. ୨୭..
ନାପେକ୍ଷତେ ଭବିଷ୍ଯଚ୍ଚ ବର୍ତମାନେ ନ ତିଷ୍ଠତି .
ନ ସଂସ୍ମରତ୍ଯତୀତଂ ଚ ସର୍ବମେବ କରୋତି ଚ .. ୨୮..
ଅନୁବନ୍ଧପରେ ଜନ୍ତାବସଂସର୍ଗମନାଃ ସଦା .
ଭକ୍ତେ ଭକ୍ତସମାଚରଃ ଶଠେ ଶଠ ଇବ ସ୍ଥିତଃ .. ୨୯..
ବାଲୋ ବାଲେଷୁ ବୃଦ୍ଧେଷୁ ବୃଦ୍ଧୋ ଧୀରେଷୁ ଧୈର୍ଯବାନ୍ .
ଯୁବା ଯୌବନବୃତ୍ତେଷୁ ଦୁଃଖିତେଷୁ ସୁଦୁଃଖଧୀଃ .. ୩୦..
ଧୀରଧୀରୁଦିତାନନ୍ଦଃ ପେଶଲଃ ପୁଣ୍ଯକୀର୍ତନଃ .
ପ୍ରାଜ୍ଞଃ ପ୍ରସନ୍ନମଧୁରୋ ଦୈନ୍ଯାଦପଗତାଶଯଃ .. ୩୧..
ଅଭ୍ଯାସେନ ପରିସ୍ପନ୍ଦେ ପ୍ରାଣାନାଂ କ୍ଷଯମାଗତେ .
ମନଃ ପ୍ରଶମମାଯାତି ନିର୍ବାଣମବଶିଷ୍ଯତେ .. ୩୨..
ଯତୋ ବାଚୋ ନିବର୍ତନ୍ତେ ବିକଲ୍ପକଲନାନ୍ବିତାଃ .
ବିକଲ୍ପସଂକ୍ଷଯାଜ୍ଜନ୍ତୋଃ ପଦଂ ତଦବଶିଷ୍ଯତେ .. ୩୩..
ଅନାଦ୍ଯନ୍ତାବଭାସାତ୍ମା ପରମାତ୍ମୈବ ବିଦ୍ଯତେ .
ଇତ୍ଯେତନ୍ନିଶ୍ଚଯଂ ସ୍ଫାରଂ ସମ୍ଯଗ୍ଜ୍ଞାନଂ ବିଦୁର୍ବୁଧାଃ .. ୩୪..
ଯଥାଭୂତାର୍ଥଦର୍ଶିତ୍ବମେତାବଦ୍ଭୁବନତ୍ରଯେ .
ଯଦାତ୍ମୈବ ଜଗତ୍ସର୍ବମିତି ନିଶ୍ଚିତ୍ଯ ପୂର୍ଣତା .. ୩୫..
ସର୍ବମାତ୍ମୈବ କୌ ଦୃଷ୍ଟୌ ଭାବାଭାବୌ କ୍ବ ବା ସ୍ଥିତୌ .
କ୍ବ ବନ୍ଧମୋକ୍ଷକଲନେ ବ୍ରହ୍ମୈବେଦଂ ବିଜୃମ୍ଭତେ .. ୩୬..
ସର୍ବମେକଂ ପରଂ ବ୍ଯୋମ କୋ ମୋକ୍ଷଃ କସ୍ଯ ବନ୍ଧତା .
ବ୍ରହ୍ମେଦଂ ବୃଂହିତାକାରଂ ବୃହଦ୍ବୃହଦବସ୍ଥିତମ୍ .. ୩୭..
ଦୂରାଦସ୍ତମିତଦ୍ବିତ୍ବଂ ଭବାତ୍ମୈବ ତ୍ବମାତ୍ମନା .
ସମ୍ଯଗାଲୋକିତେ ରୂପେ କାଷ୍ଠପାଷାଣବାସସାମ୍ .. ୩୮..
ମନାଗପି ନ ଭେଦୋଽସ୍ତି କ୍ବାସି ସଂକଲ୍ପନୋନ୍ମୁଖଃ .
ଆଦାବନ୍ତେ ଚ ସଂଶାନ୍ତସ୍ବରୂପମବିନାଶି ଯତ୍ .. ୩୯..
ବସ୍ତୂନାମାତ୍ମନଶ୍ଚୈତତ୍ତନ୍ମଯୋ ଭବ ସର୍ବଦା .
ଦ୍ବୈତାଦ୍ବୈତସମୁଦ୍ଭେଦୈର୍ଜରାମରଣବିଭ୍ରମୈଃ .. ୪୦..
ସ୍ଫୁରତ୍ଯାତ୍ମଭିରାତ୍ମୈବ ଚିତ୍ତୈରବ୍ଧୀବ ବୀଚିଭିଃ .
ଆପତ୍କରଞ୍ଜପରଶୁଂ ପରାଯା ନିର୍ବୃତେଃ ପଦମ୍ .. ୪୧..
ଶୁଦ୍ଧମାତ୍ମାନମାଲିଙ୍ଗ୍ଯ ନିତ୍ଯମନ୍ତସ୍ଥଯା ଧିଯା .
ଯଃ ସ୍ଥିତସ୍ତଂ କ ଆତ୍ମେହ ଭୋଗୋ ବାଧଯିତୁଂ କ୍ଷମଃ .. ୪୨..
କୃତସ୍ଫାରବିଚାରସ୍ଯ ମନୋଭୋଗାଦଯୋଽରଯଃ .
ମନାଗପି ନ ଭିନ୍ଦନ୍ତି ଶୈଲଂ ମନ୍ଦାନିଲା ଇବ .. ୪୩..
ନାନାତ୍ବମସ୍ତି କଲନାସୁ ନ ବସ୍ତୁତୋଽନ୍ତ- 
     ର୍ନାନାବିଧାସୁ ସରସୀବ ଜଲାଦିବାନ୍ଯତ୍ .
ଇତ୍ଯେକନିଶ୍ଚଯମଯଃ ପୁରୁଷୋ ବିମୁକ୍ତ
     ଇତ୍ଯୁଚ୍ଯତେ ସମବଲୋକିତସମ୍ଯଗର୍ଥଃ .. ୪୪..
ଇତି ଦ୍ବିତୀଯୋଽଧ୍ଯାଯଃ .. ୨..
ବିଦେହମୁକ୍ତେଃ କିଂ ରୂପଂ ତଦ୍ବାନ୍କୋ ବା ମହାମୁନିଃ .
କଂ ଯୋଗଂ ସମୁପସ୍ଥାଯ ପ୍ରାପ୍ତବାନ୍ପରମଂ ପଦମ୍ .. ୧..
ସୁମେରୋର୍ବସୁଧାପୀଠେ ମାଣ୍ଡବ୍ଯୋ ନାମ ବୈ ମୁନିଃ .
କୌଣ୍ଡିନ୍ଯାତ୍ତତ୍ତ୍ବମାସ୍ଥାଯ ଜୀବନ୍ମୁକ୍ତୋ ଭବତ୍ଯସୌ .. ୨..
ଜୀବନ୍ମୁକ୍ତିଦଶାଂ ପ୍ରାପ୍ଯ କଦାଚିଦ୍ବ୍ରହ୍ମବିତ୍ତମଃ .
ସର୍ବେନ୍ଦ୍ରିଯାଣି ସଂହର୍ତୁଂ ମନଶ୍ଚକ୍ରେ ମହାମୁନିଃ .. ୩..
ବଦ୍ଧପଦ୍ମାସନସ୍ତିଷ୍ଠନ୍ନର୍ଧୋନ୍ମୀଲିତଲୋଚନଃ .
ବାହ୍ଯାନାଭ୍ଯାନ୍ତରାଂଶ୍ଚୈବ ସ୍ପର୍ଶାନ୍ପରିହରଞ୍ଛନୈଃ .. ୪..
ତତଃ ସ୍ବମନସଃ ସ୍ଥୈର୍ଯଂ ମନସା ବିଗତୈନସା .
ଅହୋ ନୁ ଚଞ୍ଚଲମିଦଂ ପ୍ରତ୍ଯାହୃତମପି ସ୍ଫୁଟମ୍ .. ୫..
ପଟାଦ୍ଘଟମୁପାଯାତି ଘଟାଚ୍ଛକଟମୁତ୍କଟମ୍ .
ଚିତ୍ତମର୍ଥେଷୁ ଚରତି ପାଦପେଷ୍ବିବ ମର୍କଟଃ .. ୬..
ପଞ୍ଚ ଦ୍ବାରାଣି ମନସା ଚକ୍ଷୁରାଦୀନ୍ଯମୂନ୍ଯଲମ୍ .
ବୁଦ୍ଧୀନ୍ଦ୍ରିଯାଭିଧାନାନି ତାନ୍ଯେବାଲୋକଯାମ୍ଯହମ୍ .. ୭..
ହନ୍ତେନ୍ଦ୍ରିଯଗଣା ଯୂଯଂ ତ୍ଯଜତାକୁଲତାଂ ଶନୈଃ .
ଚିଦାତ୍ମା ଭଗବାନ୍ସର୍ବସାକ୍ଷିତ୍ବେନ ସ୍ଥିତୋଽସ୍ମ୍ଯହମ୍ .. ୮..
ତେନାତ୍ମନା ବହୁଜ୍ଞେନ ନିର୍ଜ୍ଞାତାଶ୍ଚକ୍ଷୁରାଦଯଃ .
ପରିନିର୍ବାମି ଶାନ୍ତୋଽସ୍ମି ଦିଷ୍ଟ୍ଯାସ୍ମି ବିଗତଜ୍ବରଃ .. ୯..
ସ୍ବାତ୍ମନ୍ଯେବାବତିଷ୍ଠେଽହଂ ତୁର୍ଯରୂପପଦେଽନିଶମ୍ .
ଅନ୍ତରେବ ଶଶାମାସ୍ଯ କ୍ରମେଣ ପ୍ରାଣସନ୍ତତିଃ .. ୧୦..
ଜ୍ବାଲାଜାଲପରିସ୍ପନ୍ଦୋ ଦଗ୍ଧେନ୍ଧନ ଇବାନଲଃ .
ତଦିତୋଽସ୍ତଂ ଗତ ଇବ ହ୍ଯସ୍ତଂ ଗତ ଇବୋଦିତଃ .. ୧୧..
ସମଃ ସମରସାଭାସସ୍ତିଷ୍ଠାମି ସ୍ବଚ୍ଛତାଂ ଗତଃ .
ପ୍ରବୁଦ୍ଧୋଽପି ସୁଷୁପ୍ତିସ୍ଥଃ ସୁଷୁପ୍ତିସ୍ଥଃ ପ୍ରବୁଦ୍ଧବାନ୍ .. ୧୨..
ତୁର୍ଯମାଲମ୍ବ୍ଯ କାଯାନ୍ତସ୍ତିଷ୍ଠାମି ସ୍ତମ୍ଭିତସ୍ଥିତିଃ .
ସବାହ୍ଯାଭ୍ଯନ୍ତରାନ୍ଭାବାନ୍ସ୍ଥୂଲାନ୍ସୂକ୍ଷ୍ମତରାନପି .. ୧୩..
ତ୍ରୈଲୋକ୍ଯସଂଭବାଂସ୍ତ୍ଯକ୍ତ୍ବା ସଂକଲ୍ପୈକବିନିର୍ମିତାନ୍ .
ସହ ପ୍ରଣବପର୍ଯନ୍ତଦୀର୍ଘନିଃସ୍ବନତନ୍ତୁନା .. ୧୪..
ଜହାବିନ୍ଦ୍ରିଯତନ୍ମାତ୍ରଜାଲଂ ଖଗ ଇବାନଲଃ .
ତତୋଽଙ୍ଗସଂବିଦଂ ସ୍ବଚ୍ଛାଂ ପ୍ରତିଭାସମୁପାଗତାମ୍ .. ୧୫..
ସଦ୍ଯୋଜାତଶିଶୁଜ୍ଞାନଂ ପ୍ରାପ୍ତବାନ୍ମୁନିପୁଙ୍ଗବଃ .
ଜହୌ ଚିତ୍ତଂ ଚୈତ୍ଯଦଶାଂ ସ୍ପନ୍ଦଶକ୍ତିମିବାନିଲଃ .. ୧୬..
ଚିତ୍ସାମାନ୍ଯମଥାସାଦ୍ଯ ସତ୍ତାମାତ୍ରାତ୍ମକଂ ତତଃ .
ସୁଷୁପ୍ତପଦମାଲମ୍ବ୍ଯ ତସ୍ଥୌ ଗିରିରିବାଚଲଃ .. ୧୭..
ସୁଷୁପ୍ତସ୍ଥୈର୍ଯମାସାଦ୍ଯ ତୁର୍ଯରୂପମୁପାଯଯୌ .
ନିରାନନ୍ଦୋଽପି ସାନନ୍ଦଃ ସଚ୍ଚାସଚ୍ଚ ବଭୂବ ସଃ .. ୧୮..
ତତସ୍ତୁ ସଂବଭୂବାସୌ ଯଦ୍ଗିରାମପ୍ଯଗୋଚରଃ .
ଯଚ୍ଛୂନ୍ଯବାଦିନାଂ ଶୂନ୍ଯଂ ବ୍ରହ୍ମ ବ୍ରହ୍ମବିଦାଂ ଚ ଯତ୍ .. ୧୯..
ବିଜ୍ଞାନମାତ୍ରଂ ବିଜ୍ଞାନବିଦାଂ ଯଦମଲାତ୍ମକମ୍ .
ପୁରୁଷଃ ସାଂଖ୍ଯଦୃଷ୍ଟୀନାମୀଶ୍ବରୋ ଯୋଗବାଦିନାମ୍ .. ୨୦..
ଶିବଃ ଶୈବାଗମସ୍ଥାନାଂ କାଲଃ କାଲୈକବାଦିନାମ୍ .
ଯତ୍ସର୍ବଶାସ୍ତ୍ରସିଦ୍ଧାନ୍ତଂ ଯତ୍ସର୍ବହୃଦଯାନୁଗମ୍ .. ୨୧..
ଯତ୍ସର୍ବଂ ସର୍ବଗଂ ବସ୍ତୁ ଯତ୍ତତ୍ତ୍ବଂ ତଦସୌ ସ୍ଥିତଃ .
ଯଦନୁକ୍ତମନିଷ୍ପନ୍ଦଂ ଦୀପକଂ ତେଜସାମପି .. ୨୨..
ସ୍ବାନୁଭୂତ୍ଯୈକମାନଂ ଚ ଯତ୍ତତ୍ତ୍ବଂ ତଦସୌ ସ୍ଥିତଃ .
ଯଦେକଂ ଚାପ୍ଯନେକଂ ଚ ସାଞ୍ଜନଂ ଚ ନିରଞ୍ଜନମ୍ .
ଯତ୍ସର୍ବଂ ଚାପ୍ଯସର୍ବଂ ଚ ଯତ୍ତତ୍ତ୍ବଂ ତଦସୁ ସ୍ଥିତଃ .. ୨୩..
ଅଜମମରମନାଦ୍ଯମାଦ୍ଯମେକଂ
     ପଦମମଲଂ ସକଲଂ ଚ ନିଷ୍କଲଂ ଚ .
ସ୍ଥିତ ଇତି ସ ତଦା ନଭଃସ୍ବରୂପା- 
     ଦପିବିମଲସ୍ଥିତିରୀଶ୍ବରଃ କ୍ଷଣେନ .. ୨୪..
ଇତି ତୃତୀଯୋଽଧ୍ଯାଯଃ .. ୩..
ଜୀବନ୍ମୁକ୍ତସ୍ଯ କିଂ ଲକ୍ଷ୍ମ ହ୍ଯାକାଶଗମନାଦିକମ୍ .
ତଥା ଚେନ୍ମୁନିଶାର୍ଦୂଲ ତତ୍ର ନୈବ ପ୍ରଲକ୍ଷ୍ଯତେ .. ୧..
ଅନାତ୍ମବିଦମୁକ୍ତୋଽପି ନଭୋବିହରଣାଦିକମ୍ .
ଦ୍ରବ୍ଯମନ୍ତ୍ରକ୍ରିଯାକାଲଶକ୍ତ୍ଯାପ୍ନୋତ୍ଯେବ ସ ଦ୍ବିଜଃ ..୨..
ନାତ୍ମଜ୍ଞସ୍ଯୈଷ ବିଷଯ ଆତ୍ମଜ୍ଞୋ ହ୍ଯାତ୍ମମାତ୍ରଦୃକ୍ .
ଆତ୍ମନାତ୍ମନି ସଂତୃପ୍ତୋ ନାବିଦ୍ଯାମନୁଧାବତି .. ୩..
ଯେ ଯେ ଭାବାଃ ସ୍ଥିତା ଲୋକେ ତାନବିଦ୍ଯାମଯାନ୍ବିଦୁଃ .
ତ୍ଯକ୍ତାବିଦ୍ଯୋ ମହାଯୋଗୀ କଥଂ ତେଷୁ ନିମଜ୍ଜତି .. ୪..
ଯସ୍ତୁ ମୂଢୋଽଲ୍ପବୁଦ୍ଧିର୍ବା ସିଦ୍ଧିଜାଲାନି ବାଞ୍ଛତି .
ସିଦ୍ଧିସାଧନୈର୍ଯୋଗୈସ୍ତାନି ସାଧଯତି କ୍ରମାତ୍ .. ୫..
ଦ୍ରବ୍ଯମନ୍ତ୍ରକ୍ରିଯାକାଲଯୁକ୍ତଯଃ ସାଧୁସିଦ୍ଧିଦାଃ .
ପରମାତ୍ମପଦପ୍ରାପ୍ତୌ ନୋପକୁର୍ବନ୍ତି କାଶ୍ଚନ .. ୬..
ଯସ୍ଯେଚ୍ଛା ବିଦ୍ଯତେ କାଚିତ୍ସା ସିଦ୍ଧିଂ ସାଧଯତ୍ଯହୋ .
ନିରିଚ୍ଛୋଃ ପରିପୂର୍ଣସ୍ଯ ନେଚ୍ଛା ସଂଭବତି କ୍ବଚିତ୍ .. ୭..
ସର୍ବେଚ୍ଛାଜାଲସଂଜ୍ଞାନ୍ତାବାତ୍ମଲାଭୋ ଭବେନ୍ମୁନେ .
ସ କଥଂ ସିଦ୍ଧିଜାଲାନି ନୂନଂ ବାଞ୍ଛନ୍ତ୍ଯଚିତ୍ତକଃ .. ୮..
ଅପି ଶୀତରୁଚାବର୍କେ ସୁତୀକ୍ଷ୍ଣେଽପୀନ୍ଦୁମଣ୍ଡଲେ .
ଅପ୍ଯଧଃ ପ୍ରସରତ୍ଯଗ୍ନୌ ଜୀବନ୍ମୁକ୍ତୋ ନ ବିସ୍ମଯୀ .. ୯..
ଅଧିଷ୍ଠାନେ ପରେ ତତ୍ତ୍ବେ କଲ୍ପିତା ରଜ୍ଜୁସର୍ପବତ୍ .
କଲ୍ପିତାଶ୍ଚର୍ଯଜାଲେଷୁ ନାଭ୍ଯୁଦେତି କୁତୂହଲମ୍ .. ୧୦..
ଯେ ହି ବିଜ୍ଞାତବିଜ୍ଞେଯା ବୀତରାଗା ମହାଧିଯଃ .
ବିଚ୍ଛିନ୍ନଗ୍ରନ୍ଥଯଃ ସର୍ବେ ତେ ସ୍ବତନ୍ତ୍ରାସ୍ତନୌ ସ୍ଥିତଃ .. ୧୧
ସୁଖଦୁଃଖଦଶାଧୀରଂ ସାମ୍ଯାନ୍ନ ପ୍ରୋଦ୍ଧରନ୍ତି ଯମ୍ .
ନିଶ୍ବାସା ଇବ ଶୈଲେନ୍ଦ୍ରଂ ଚିତ୍ତଂ ତସ୍ଯ ମୃତଂ ବିଦୁଃ .. ୧୨..
ଆପତ୍କାର୍ପଣ୍ଯମୁତ୍ସାହୋ ମଦୋ ମାନ୍ଦ୍ଯଂ ମହୋତ୍ସବଃ .
ଯଂ ନଯନ୍ତି ନ ବୈରୂପ୍ଯଂ ତସ୍ଯ ନଷ୍ଟଂ ମନୋ ବିଦୁଃ .. ୧୩..
ଦ୍ବିବିଧଚିତ୍ତନାଶୋଽସ୍ତି ସରୂପୋଽରୂପ ଏବ ଚ .
ଜୀବନ୍ମୁକ୍ତୌ ସରୂପଃ ସ୍ଯାଦରୂପୋ ଦେହମୁକ୍ତିଗଃ .. ୧୪..
ଚିତ୍ତସତ୍ତେହ ଦୁଃଖାଯ ଚିତ୍ତନାଶଃ ସୁଖାଯ ଚ .
ଚିତ୍ତସତ୍ତଂ କ୍ଷଯଂ ନୀତ୍ବା ଚିତ୍ତଂ ନାଶମୁପାନଯେତ୍ .. ୧୫..
ମନସ୍ତାଂ ମୂଢତାଂ ବିଦ୍ଧି ଯଦା ନଶ୍ଯତି ସାନଘ .
ଚିତ୍ତନାଶାଭିଧାନଂ ହି ତତ୍ସ୍ବରୂପମିତୀରିତମ୍ .. ୧୬..
ମୈତ୍ର୍ଯାଦିଭିର୍ଗୁଣୈର୍ଯୁକ୍ତଂ ଭବତ୍ଯୁତ୍ତମବାସନମ୍ .
ଭୂଯୋ ଜନ୍ମବିନିର୍ମୁକ୍ତଂ ଜୀବନ୍ମୁକ୍ତସ୍ଯ ତନ୍ମନଃ .. ୧୭..
ସରୂପୋଽସୌ ମନୋନାଶୋ ଜୀବନ୍ମୁକ୍ତସ୍ଯ ବିଦ୍ଯତେ .
ନିଦାଘାଽରୂପନାଶସ୍ତୁ ବର୍ତତେ ଦେହମୁକ୍ତିକେ .. ୧୮..
ବିଦେହମୁକ୍ତ ଏବାସୌ ବିଦ୍ଯତେ ନିଷ୍କଲାତ୍ମକଃ .
ସମଗ୍ରାଗ୍ର୍ଯଗୁଣାଧାରମପି ସତ୍ତ୍ବଂ ପ୍ରଲୀଯତେ .. ୧୯..
ବିଦେହମୁକ୍ତୌ ବିମଲେ ପଦେ ପରମପାବନେ .
ବିଦେହମୁକ୍ତିବିଷଯେ ତସ୍ମିନ୍ସତ୍ତ୍ବକ୍ଷଯାତ୍ମକେ .. ୨୦..
ଚିତ୍ତନାଶେ ବିରୂପାଖ୍ଯେ ନ କିଂଚିଦିହ ବିଦ୍ଯତେ .
ନ ଗୁଣା ନାଗୁଣାସ୍ତତ୍ର ନ ଶ୍ରୀର୍ନାଶ୍ରୀର୍ନ ଲୋକତା .. ୨୧..
ନ ଚୋଦଯୋ ନାସ୍ତମଯୋ ନ ହର୍ଷାମର୍ଷସଂବିଦଃ .
ନ ତେଜୋ ନ ତମଃ କିଂଚିନ୍ନ ସନ୍ଧ୍ଯାଦିନରାତ୍ରଯଃ .
ନ ସତ୍ତାପି ନ ଚାସତ୍ତା ନ ଚ ମଧ୍ଯଂ ହି ତତ୍ପଦମ୍ .. ୨୨..
ଯେ ହି ପାରଂ ଗତା ବୁଦ୍ଧେଃ ସଂସାରାଡମ୍ବରସ୍ଯ ଚ .
ତେଷାଂ ତଦାସ୍ପଦଂ ସ୍ଫାରଂ ପବନାନାମିବାମ୍ବରମ୍ .. ୨୩..
ସଂଶାନ୍ତଦୁଃଖମଜଡାତ୍ମକମେକସୁପ୍ତ- 
     ମାନନ୍ଦମନ୍ଥରମପେତରଜସ୍ତମୋ ଯତ୍ .
ଆକାଶକୋଶତନବୋଽତନବୋ ମହାନ୍ତ- 
     ସ୍ତସ୍ମିନ୍ପଦେ ଗଲିତଚିତ୍ତଲବା ଭବନ୍ତି .. ୨୪..
ହେ ନିଦାଘ ମହାପ୍ରାଜ୍ଞ ନିର୍ବାସନମନା ଭବ .
ବଲାଚ୍ଚେତଃ ସମାଧାଯ ନିର୍ବିକଲ୍ପମନା ଭବ .. ୨୫..
ଯଜ୍ଜଗଦ୍ଭାସକଂ ଭାନଂ ନିତ୍ଯଂ ଭାତି ସ୍ବତଃ ସ୍ଫୁରତ୍ .
ସ ଏବ ଜଗତଃ ସାକ୍ଷୀ ସର୍ବାତ୍ମା ବିମଲାକୃତିଃ .. ୨୬..
ପ୍ରତିଷ୍ଠା ସର୍ବଭୂତାନାଂ ପ୍ରଜ୍ଞାନଘନଲକ୍ଷଣଃ .
ତଦ୍ବିଦ୍ଯାବିଷଯଂ ବ୍ରହ୍ମ ସତ୍ଯଜ୍ଞାନସୁଖାଦ୍ବନମ୍ .. ୨୭..
ଏକଂ ବ୍ରହ୍ମାହମସ୍ମୀତି କୃତକୃତ୍ଯୋ ଭବେନ୍ମୁନିଃ .. ୨୮..
ସର୍ବାଧିଷ୍ଠାନମଦ୍ବନ୍ଦ୍ବଂ ପରଂ ବ୍ରହ୍ମ ସନାତନମ୍ .
ସଚ୍ଚିଦାନନ୍ଦରୂପଂ ତଦବାଙ୍ମନସଗୋଚରମ୍ .. ୨୯..
ନ ତତ୍ର ଚନ୍ଦ୍ରାର୍କବପୁଃ ପ୍ରକାଶତେ
     ନ ବାନ୍ତି ବାତଃ ସକଲାଶ୍ଚ ଦେବତାଃ .
ସ ଏବ ଦେବଃ କୃତଭାବଭୂତଃ
     ସ୍ବଯଂ ବିଶୁଦ୍ଧୋ ବିରଜଃ ପ୍ରକାଶତେ .. ୩୦..
ଭିଦ୍ଯତେ ହୃଦଯଗ୍ରନ୍ଥିଶ୍ଛିଦ୍ଯନ୍ତେ ସର୍ବସଂଶଯାଃ .
କ୍ଷୀଯନ୍ତେ ଚାସ୍ଯ କର୍ମାଣି ତସ୍ମିନ୍ଦୃଷ୍ଟେ ପରାବରେ .. ୩୧..
ଦ୍ବୌ ସୁପର୍ଣୌ ଶରୀରେଽସ୍ମିଞ୍ଜୀବେଶାଖ୍ଯୌ ସହ ସ୍ଥିତୌ .
ତଯୋର୍ଜୀବଃ ଫଲଂ ଭୁଙ୍କ୍ତେ କର୍ମଣୋ ନ ମହେଶ୍ବରଃ .. ୩୨..
କେବଲଂ ସାକ୍ଷିରୂପେଣ ବିନା ଭୋଗୋ ମହେଶ୍ବରଃ .
ପ୍ରକାଶତେ ସ୍ବଯଂ ଭେଦଃ କଲ୍ପିତୋ ମାଯଯା ତଯୋଃ .
ଚିଚ୍ଚିଦାକାରତୋ ଭିନ୍ନା ନ ଭିନ୍ନା ଚିତ୍ତ୍ବହାନିତଃ .. ୩୩..
ତର୍କତଶ୍ଚ ପ୍ରମାଣାଚ୍ଚ ଚିଦେକତ୍ବବ୍ଯବସ୍ଥିତେଃ .
ଚିଦେକତ୍ବପରିଜ୍ଞାନେ ନ ଶୋଚତି ନ ମୁହ୍ଯତି .. ୩୪..
ଅଧିଷ୍ଠାନଂ ସମସ୍ତସ୍ଯ ଜଗତଃ ସତ୍ଯଚିଦ୍ଘନମ୍ .
ଅହମସ୍ମୀତି ନିଶ୍ଚିତ୍ଯ ବୀତଶୋକୋ ଭବେନ୍ମୁନିଃ .. ୩୫..
ସ୍ବଶରୀରେ ସ୍ବଯଂଜ୍ଯୋତିସ୍ବରୂପଂ ସର୍ବସାକ୍ଷିଣମ୍ .
କ୍ଷୀଣଦୋଷାଃ ପ୍ରପଶ୍ଯନ୍ତି ନେତରେ ମାଯଯାବୃତାଃ .. ୩୬..
ତମେବ ଧୀରୋ ବିଜ୍ଞାଯ ପ୍ରଜ୍ଞାଂ କୁର୍ବୀତ ବ୍ରାହ୍ମଣଃ .
ନାନୁଧ୍ଯାଯାଦ୍ବହୂଞ୍ଛବ୍ଦାନ୍ବାଚୋ ବିଗ୍ଲାପନଂ ହି ତତ୍ .. ୩୭..
ବାଲେନୈବ ହି ତିଷ୍ଠାସେନ୍ନିର୍ବିଦ୍ଯ ବ୍ରହ୍ମବେଦନମ୍ .
ବ୍ରହ୍ମବିଦ୍ଯାଂ ଚ ବାଲ୍ଯଂ ଚ ନିର୍ବିଦ୍ଯ ମୁନିରାତ୍ମବାନ୍ .. ୩୮..
ଅନ୍ତର୍ଲୀନସମାରମ୍ଭଃ ଶୁଭାଶୁଭମହାଙ୍କୁରମ୍ .
ସଂସୃତିବ୍ରତତେର୍ବୀଜଂ ଶରୀରଂ ବିଦ୍ଧି ଭୌତିକମ୍ .. ୩୯..
ଭାବାଭାବଦଶାକୋଶଂ ଦୁଃଖରତ୍ନସମୁଦ୍ଗକମ୍ .
ବୀଜମସ୍ଯ ଶରୀରସ୍ଯ ଚିତ୍ତମାଶାବଶାନୁଗମ୍ .. ୪୦..
ଦ୍ବେ ବୀଜେ ଚିତ୍ତବୃକ୍ଷସ୍ଯ ବୃତ୍ତିବ୍ରତତିଧାରିଣଃ .
ଏକଂ ପ୍ରାଣପରିସ୍ପନ୍ଦୋ ଦ୍ବିତୀଯୋ ଦୃଢଭାବନା .. ୪୧..
ଯଦା ପ୍ରସ୍ପନ୍ଦନ୍ତେ ପ୍ରାଣୋ ନାଡୀସଂସ୍ପର୍ଶନୋଦ୍ଯତଃ .
ତଦା ସଂବେଦନମଯଂ ଚିତ୍ତମାଶୁ ପ୍ରଜାଯତେ .. ୪୨..
ସା ହି ସର୍ବଗତା ସଂବିତ୍ପ୍ରାଣସ୍ପନ୍ଦେନ ବୋଧ୍ଯତେ .
ସଂବିତ୍ସଂରୋଧନଂ ଶ୍ରେଯଃ ପ୍ରାଣାଦିସ୍ପନ୍ଦନଂ ବରମ୍ .. ୪୩..
ଯୋଗିନଶ୍ଚିତ୍ତଶାନ୍ତ୍ଯର୍ଥଂ କୁର୍ବନ୍ତି ପ୍ରାଣରୋଧନମ୍ .
ପ୍ରାଣାଯାମୈସ୍ତଥା ଧ୍ଯାନୈଃ ପ୍ରଯୋଗୈର୍ଯୁକ୍ତିକଲ୍ପିତୈଃ .. ୪୪..
ଚିତ୍ତୋପଶାନ୍ତିଫଲଦଂ ପରମଂ ବିଦ୍ଧି କାରଣମ୍ .
ସୁଖଦଂ ସଂବିଦଃ ସ୍ବାସ୍ଥ୍ଯଂ ପ୍ରାଣସଂରୋଧନଂ ବିଦୁଃ .. ୪୫..
ଦୃଢଭାବନଯା ତ୍ଯକ୍ତପୂର୍ବାପରବିଚାରଣମ୍ .
ଯଦାଦାନଂ ପଦାର୍ଥସ୍ଯ ବାସନା ସା ପ୍ରକୀର୍ତିତା .. ୪୬..
ଯଦା ନ ଭାବ୍ଯତେ କିଂଚିଦ୍ଧେଯୋପାଦେଯରୂପି ଯତ୍ .
ସ୍ଥୀଯତେ ସକଲଂ ତ୍ଯକ୍ତ୍ବା ତଦା ଚିତ୍ତଂ ନ ଜାଯତେ .. ୪୭..
ଅବାସନତ୍ବାତ୍ସତତଂ ଯଦା ନ ମନୁତେ ମନଃ .
ଅମନସ୍ତା ତଦୋଦେତି ପରମୋପଶମପ୍ରଦା .. ୪୮..
ଯଦା ନ ଭାବ୍ଯତେ ଭାବଃ କ୍ବଚିଜ୍ଜଗତି ବସ୍ତୁନି .
ତଦା ହୃଦମ୍ବରେ ଶୂନ୍ଯେ କଥଂ ଚିତ୍ତଂ ପ୍ରଜାଯତେ .. ୪୯..
ଯଦଭାବନମାସ୍ଥାଯ ଯଦଭାବସ୍ଯ ଭାବନମ୍ .
ଯଦ୍ଯଥା ବସ୍ତୁଦର୍ଶିତ୍ବଂ ତଦଚିତ୍ତତ୍ବମୁଚ୍ଯତେ .. ୫୦..
ସର୍ବମନ୍ତଃ ପରିତ୍ଯଜ୍ଯ ଶୀତଲାଶଯବର୍ତି ଯତ୍ .
ବୃତ୍ତିସ୍ଥମପି ତଚ୍ଚିତ୍ତମସଦ୍ରୂପମୁଦାହୃତମ୍ .. ୫୧..
ଭ୍ରଷ୍ଟବୀଜୋପମା ଯେଷାଂ ପୁନର୍ଜନନବର୍ଜିତା .
ବାସନାରସନାହୀନା ଜୀବନ୍ମୁକ୍ତା ହି ତେ ସ୍ମୃତାଃ .. ୫୨..
ସତ୍ତ୍ବରୂପପରିପ୍ରାପ୍ତଚିତ୍ତାସ୍ତେ ଜ୍ଞାନପାରଗାଃ .
ଅଚିତ୍ତା ଇତି କଥ୍ଯନ୍ତେ ଦେହାନ୍ତେ ବ୍ଯୋମରୂପିଣଃ .. ୫୩..
ସଂବେଦ୍ଯସଂପରିତ୍ଯାଗାତ୍ପ୍ରାଣସ୍ପନ୍ଦନବାସନେ .
ସମୂଲଂ ନଶ୍ଯତଃ କ୍ଷିପ୍ରଂ ମୂଲଚ୍ଛେଦାଦିବ ଦ୍ରୁମଃ .. ୫୪..
ପୂର୍ବଦୃଷ୍ଟମଦୃଷ୍ଟଂ ବା ଯଦସ୍ଯାଃ ପ୍ରତିଭାସତେ .
ସଂବିଦସ୍ତତ୍ପ୍ରଯତ୍ନେନ ମାର୍ଜନୀଯଂ ବିଜାନତା .. ୫୫..
ତଦମାର୍ଜନମାତ୍ରଂ ହି ମହାସଂସାରତାଂ ଗତମ୍ .
ତତ୍ପ୍ରମାର୍ଜନମାତ୍ରଂ ତୁ ମୋକ୍ଷ ଇତ୍ଯଭିଧୀଯତେ .. ୫୬..
ଅଜଡୋ ଗଲିତାନନ୍ଦସ୍ତ୍ଯକ୍ତସଂବେଦନୋ ଭବ .. ୫୭..
ସଂବିଦ୍ବସ୍ତୁଦଶାଲମ୍ବଃ ସା ଯସ୍ଯେହ ନ ବିଦ୍ଯତେ .
ସୋଽସଂବିଦଜଡଃ ପ୍ରୋକ୍ତଃ କୁର୍ବନ୍କାର୍ଯଶତାନ୍ଯପି .. ୫୮..
ସଂବେଦ୍ଯେନ ହୃଦାକାଶେ ମନାଗପି ନ ଲିପ୍ଯତେ .
ଯସ୍ଯାସାବଜଡା ସଂବିଜ୍ଜୀବନ୍ମୁକ୍ତଃ ସ କଥ୍ଯତେ .. ୫୯..
ଯଦା ନ ଭାବ୍ଯତେ କିଂଚିନ୍ନିର୍ବାସନତଯାତ୍ମନି .
ବାଲମୂକାଦିବିଜ୍ଞାନମିବ ଚ ସ୍ଥୀଯତେ ସ୍ଥିରମ୍ .. ୬୦..
ତଦା ଜାଡ୍ଯବିନିର୍ମୁକ୍ତମସଂବେଦନମାତତମ୍ .
ଆଶ୍ରିତଂ ଭବତି ପ୍ରାଜ୍ଞୋ ଯସ୍ମାଦ୍ଭୂଯୋ ନ ଲିପ୍ଯତେ .. ୬୧..
ସମସ୍ତା ବାସନାସ୍ତ୍ଯକ୍ତ୍ବା ନିର୍ବିକଲ୍ପସମାଧିତଃ .
ତନ୍ମଯତ୍ବାଦନାଦ୍ଯନ୍ତେ ତଦପ୍ଯନ୍ତର୍ବିଲୀଯତେ .. ୬୨..
ତିଷ୍ଠନ୍ଗଚ୍ଛନ୍ସ୍ପୃଶଞ୍ଜିଘ୍ରନ୍ନପି ତଲ୍ଲେପବର୍ଜିତଃ .
ଅଜଡୋ ଗଲିତାନନ୍ଦସ୍ତ୍ଯକ୍ତସଂବେଦନଃ ସୁଖୀ .. ୬୩..
ଏତାଂ ଦୃଷ୍ଟିମବଷ୍ଟଭ୍ଯ କଷ୍ଟଚେଷ୍ଟାଯୁତୋଽପି ସନ୍ .
ତରେଦ୍ଦୁଃଖାମ୍ବୁଧେଃ ପାରମପାରଗୁଣସାଗରଃ .. ୬୪..
ବିଶେଷଂ ସଂପରିତ୍ଯଜ୍ଯ ସନ୍ମାତ୍ରଂ ଯଦଲେପକମ୍ .
ଏକରୂପଂ ମହାରୂପଂ ସତ୍ତାଯାସ୍ତତ୍ପଦଂ ବିଦୁଃ .. ୬୫..
କାଲସତ୍ତା କଲାସତ୍ତା ବସ୍ତୁସତ୍ତେଯମିତ୍ଯପି .
ବିଭାଗକଲନାଂ ତ୍ଯକ୍ତ୍ବା ସନ୍ମାତ୍ରୈକପରୋ ଭବ .. ୬୬..
ସତ୍ତାସାମାନ୍ଯମେବୈକଂ ଭାବଯନ୍କେବଲଂ ବିଭୁଃ .
ପରିପୂର୍ଣଃ ପରାନନ୍ଦି ତିଷ୍ଠାପୂରିତଦିଗ୍ଭରଃ .. ୬୭..
ସତ୍ତାସାମାନ୍ଯପର୍ଯନ୍ତେ ଯତ୍ତତ୍କଲନଯୋଜ୍ଝିତମ୍ .
ପଦମାଦ୍ଯମନାଦ୍ଯନ୍ତଂ ତସ୍ଯ ବୀଜଂ ନ ବିଦ୍ଯତେ .. ୬୮..
ତତ୍ର ସଂଲୀଯତେ ସଂବିନ୍ନିର୍ବିକଲ୍ପଂ ଚ ତିଷ୍ଠତି .
ଭୂଯୋ ନ ବର୍ତତେ ଦୁଃଖେ ତତ୍ର ଲବ୍ଧପଦଃ ପୁମାନ୍ .. ୬୯..
ତଦ୍ଧେତୁଃ ସର୍ବଭୂତାନାଂ ତସ୍ଯ ହେତୁର୍ନ ବିଦ୍ଯତେ .
ସ ସାରଃ ସର୍ବସାରାଣାଂ ତସ୍ମାତ୍ସାରୋ ନ ବିଦ୍ଯତେ .. ୭୦..
ତସ୍ମିଂଶ୍ଚିଦ୍ଦର୍ପଣେ ସ୍ଫାରେ ସମସ୍ତା ବସ୍ତୁଦୃଷ୍ଟଯଃ .
ଇମାସ୍ତାଃ ପ୍ରତିବିମ୍ବନ୍ତି ସରସୀବ ତଟଦ୍ରୁମାଃ .. ୭୧..
ତଦମଲମରଜଂ ତଦାତ୍ମତତ୍ତ୍ବଂ
     ତଦବଗତାବୁପଶାନ୍ତିମେତି ଚେତଃ .
ଅବଗତବିଗତୈକତତ୍ସ୍ବରୂପୋ
     ଭବଭଯମୁକ୍ତପଦୋଽସି ସମ୍ଯଗେବ .. ୭୨..
ଏତେଷାଂ ଦୁଃଖବୀଜାନାଂ ପ୍ରୋକ୍ତଂ ଯଦ୍ଯନ୍ମଯୋତ୍ତରମ୍ .
ତସ୍ଯ ତସ୍ଯ ପ୍ରଯୋଗେଣ ଶୀଘ୍ରଂ ତତ୍ପ୍ରାପ୍ଯତେ ପଦମ୍ .. ୭୩..
ସତ୍ତାସାମାନ୍ଯକୋଟିସ୍ଥେ ଦ୍ରାଗିତ୍ଯେବ ପଦେ ଯଦି .
ପୌରୁଷେଣ ପ୍ରଯତ୍ନେନ ବଲାତ୍ସଂତ୍ଯଜ୍ଯ ବାସନାମ୍ .. ୭୪..
ସ୍ଥିତିଂ ବଧ୍ନାସି ତତ୍ତ୍ବଜ୍ଞ କ୍ଷଣମପ୍ଯକ୍ଷଯାତ୍ମିକାମ୍ .
କ୍ଷଣେଽସ୍ମିନ୍ନେବ ତତ୍ସାଧୁ ପଦମାସାଦଯସ୍ଯଲମ୍ ..୭୫..
ସତ୍ତାସାମାନ୍ଯରୂପେ ବା କରୋଷି ସ୍ଥିତିମାଦରାତ୍ .
ତତ୍କିଂଚିଦଧିକେନେହ ଯତ୍ନେନାପ୍ନୋଷି ତତ୍ପଦମ୍ .. ୭୬..
ସଂବିତ୍ତତ୍ତ୍ବେ କୃତଧ୍ଯାନୋ ନିଦାଘ ଯଦି ତିଷ୍ଠସି .
ତଦ୍ଯତ୍ନେନାଧିକେନୋଚ୍ଚୈରାସାଦଯସି ତତ୍ପଦମ୍ .. ୭୭..
ବାସନାସଂପରିତ୍ଯାଗେ ଯଦି ଯତ୍ନଂ କରୋଷି ଭୋଃ .
ଯାବଦ୍ବିଲୀନଂ ନ ମନୋ ନ ତାବଦ୍ବାସନାକ୍ଷଯଃ .. ୭୮..
ନ କ୍ଷୀଣା ବାସନା ଯାବଚ୍ଚିତ୍ତଂ ତାବନ୍ନ ଶାମ୍ଯତି .
ଯାବନ୍ନ ତତ୍ତ୍ବବିଜ୍ଞାନଂ ତାବଚ୍ଚିତ୍ତଶମଃ କୁତଃ .. ୭୯..
ଯାବନ୍ନ ଚିତ୍ତୋପଶମୋ ନ ତାବତ୍ତତ୍ତ୍ବବେଦନମ୍ .
ଯାବନ୍ନ ବାସନାନାଶସ୍ତାବତ୍ତତ୍ତ୍ବାଗମଃ କୁତଃ .
ଯାବନ୍ନ ତତ୍ତ୍ବସଂପ୍ରାପ୍ତିର୍ନ ତାବଦ୍ବାସନକ୍ଷଯଃ .. ୮୦..
ତତ୍ତ୍ବଜ୍ଞାନଂ ମନୋନାଶୋ ବାସନାକ୍ଷଯ ଏବ ଚ .
ମିଥଃ କାରଣତାଂ ଗତ୍ବା ଦୁଃସାଧାନି ସ୍ଥିତାନ୍ଯତଃ .. ୮୧..
ଭୋଗେଚ୍ଛାଂ ଦୂରତସ୍ତ୍ଯକ୍ତ୍ବା ତ୍ରଯମେତତ୍ସମାଚର .. ୮୨..
ବାସନାକ୍ଷଯବିଜ୍ଞାନମନୋନାଶା ମହାମତେ .
ସମକାଲଂ ଚିରାଭ୍ଯସ୍ତା ଭବନ୍ତି ଫଲଦା ମତାଃ .. ୮୩..
ତ୍ରିଭିରେଭିଃ ସମଭ୍ଯସ୍ତୈର୍ହୃଦଯଗ୍ରନ୍ଥଯୋ ଦୃଢାଃ .
ନିଃଶେଷମେବ ତ୍ରୁଟ୍ଯନ୍ତି ବିସଚ୍ଛେଦାଦ୍ଗୁଣା ଇବ .. ୮୪..
ବାସନାସଂପରିତ୍ଯାଗସମଂ ପ୍ରାଣନିରୋଧନମ୍ .
ବିଦୁସ୍ତତ୍ତ୍ବବିଦସ୍ତସ୍ମାତ୍ତଦପ୍ଯେବଂ ସମାହରେତ୍ .. ୮୫..
ବାସନାସଂପରିତ୍ଯାଗାଚ୍ଚିତ୍ତଂ ଗଚ୍ଛତ୍ଯଚିତ୍ତତାମ୍ .
ପ୍ରାଣସ୍ପନ୍ଦନିରୋଧାଚ୍ଚ ଯଥେଚ୍ଛସି ତଥା କୁରୁ .. ୮୬..
ପ୍ରାଣାଯାମଦୃଢାଧ୍ଯାସୈର୍ଯୁକ୍ତ୍ଯା ଚ ଗୁରୁଦତ୍ତଯା .
ଆସନାଶନଯୋଗେନ ପ୍ରାଣସ୍ପନ୍ଦୋ ନିରୁଧ୍ଯତେ .. ୮୭..
ନିଃସଙ୍ଗବ୍ଯବହାରତ୍ବାଦ୍ଭବଭାବନବର୍ଜନାତ୍ .
ଶରୀରନାଶଦର୍ଶିତ୍ବାଦ୍ବାସନା ନ ପ୍ରବର୍ତତେ .. ୮୮..
ଯଃ ପ୍ରାଣପବନସ୍ପନ୍ଦଶ୍ଚିତ୍ତସ୍ପନ୍ଦଃ ସ ଏବ ହି .
ପ୍ରାଣସ୍ପନ୍ଦଜଯେ ଯତ୍ନଃ କର୍ତବ୍ଯୋ ଧୀମତୋଚ୍ଚକୈଃ .. ୮୯..
ନ ଶକ୍ଯତେ ମନୋ ଜେତୁଂ ବିନା ଯୁକ୍ତିମନିନ୍ଦିତାମ୍ .
ଶୁଦ୍ଧାଂ ସଂବିଦମାଶ୍ରିତ୍ଯବୀତରାଗଃ ସ୍ଥିରୋ ଭବ .. ୯୦..
ସଂବେଦ୍ଯବର୍ଜିତମନୁତ୍ତମମାଦ୍ଯମେକଂ
     ସଂବିଦତ୍ପଦଂ ବିକଲନଂ କଲଯନ୍ମହାତ୍ମନ୍ .
ହୃଦ୍ଯେବ ତିଷ୍ଠ କଲନାରହିତଃ କ୍ରିଯାଂ ତୁ
     କୁର୍ବନ୍ନକର୍ତୃପଦମେତ୍ଯ ଶମୋଦିତଶ୍ରୀଃ .. ୯୧..
ମନାଗପି ବିଚାରେଣ ଚେତସଃ ସ୍ବସ୍ଯ ନିଗ୍ରହଃ .
ପୁରୁଷେଣ କୃତୋ ଯେନ ତେନାପ୍ତଂ ଜନ୍ମନଃ ଫଲମ୍ .. ୯୨..
ଇତି ଚତୁର୍ଥୋଽଧ୍ଯାଯଃ .. ୪..
ଗଚ୍ଛତସ୍ତିଷ୍ଠତୋ ବାପି ଜାଗ୍ରତଃ ସ୍ବପତୋଽପି ବା .
ନ ବିଚାରପରଂ ଚେତୋ ଯସ୍ଯାସୌ ମୃତ ଉଚ୍ଯତେ .. ୧..
ସମ୍ଯଗ୍ଜ୍ଞାନସମାଲୋକଃ ପୁମା~ଜ୍ଞେଯସମଃ ସ୍ବଯମ୍ .
ନ ବିଭେତି ନ ଚାଦତ୍ତେ ବୈବଶ୍ଯଂ ନ ଚ ଦୀନତାମ୍ .. ୨..
ଅପବିତ୍ରମପଥ୍ଯଂ ଚ ବିଷସଂସର୍ଗଦୂଷିତମ୍ .
ଭୁକ୍ତଂ ଜରଯତି ଜ୍ଞାନୀ କ୍ଲିନ୍ନଂ ନଷ୍ଠଂ ଚ ମୃଷ୍ଟବତ୍ .. ୩..
ସଞ୍ଣ୍ଗତ୍ଯାଗଂ ବିଦୁର୍ମୋକ୍ଷଂ ସଙ୍ଗତ୍ଯାଗାଦଜନ୍ମତା .
ସଙ୍ଗଂ ତ୍ଯଜ ତ୍ବଂ ଭାବାନାଂ ଜୀବନ୍ମୁକ୍ତୋ ଭବାନଘ .. ୪..
ଭାବାଭାବେ ପଦାର୍ଥାନାଂ ହର୍ଷାମର୍ଷବିକାରଦା .
ମଲିନା ବାସନା ଯୈଷା ସାଽସଙ୍ଗ ଇତି କଥ୍ଯତେ .. ୫..
ଜୀବନ୍ମୁକ୍ତଶରୀରାଣାମପୁନର୍ଜନ୍ମକାରିଣୀ .
ମୁକ୍ତା ହର୍ଷବିଷାଦାଭ୍ଯାଂ ଶୁଦ୍ଧା ଭବତି ବାସନା .. ୬..
ଦୁଃଖୈର୍ନ ଗ୍ଲାନିମାଯାସି ହୃଦି ହୃଷ୍ଯସି ନୋ ସୁଖୈଃ .
ଆଶାବୈବଶ୍ଯମୁତ୍ସୃଜ୍ଯ ନିଦାଘାଽସଙ୍ଗତାଂ ବ୍ରଜ .. ୭..
ଦିକ୍କାଲାଦ୍ଯନବଚ୍ଛିନ୍ନମଦୃଷ୍ଟୋଭଯକୋଟିକମ୍ .
ଚିନ୍ମାତ୍ରମକ୍ଷଯଂ ଶାନ୍ତମେକଂ ବ୍ରହ୍ମାସ୍ମି ନେତରତ୍ .. ୮..
ଇତି ମତ୍ବାହମିତ୍ଯନ୍ତର୍ମୁକ୍ତାମୁକ୍ତବପୁଃ ପୁମାନ୍ .
ଏକରୂପଃ ପ୍ରଶାନ୍ତାତ୍ମା ମୌନୀ ସ୍ବାତ୍ମସୁଖୋ ଭବ .. ୯..
ନାସ୍ତି ଚିତ୍ତଂ ନ ଚାବିଦ୍ଯା ନ ମନୋ ନ ଚ ଜୀବକଃ .
ବ୍ରହ୍ମୈବୈକମନାଦ୍ଯନ୍ତମବ୍ଧିବତ୍ପ୍ରବିଜୃମ୍ଭତେ .. ୧୦..
ଦେହେ ଯାବଦହଂଭାବୋ ଦୃଶ୍ଯେଽସ୍ମିନ୍ଯାବଦାତ୍ମତା .
ଯାବନ୍ମମେଦମିତ୍ଯାସ୍ଥା ତାବଚ୍ଚିତ୍ତାଦିବିଭ୍ରମଃ .. ୧୧..
ଅନ୍ତର୍ମୁଖତଯା ସର୍ବଂ ଚିଦ୍ବହ୍ନୌ ତ୍ରିଜଗତ୍ତୃଣମ୍ .
ଜୁହ୍ବନ୍ତୋଽନ୍ତର୍ନିବର୍ତନ୍ତେ ମୁନେ ଚିତ୍ତାଦିବିଭ୍ରମାଃ .. ୧୨..
ଚିଦାତ୍ମାସ୍ମି ନିରଂଶୋଽସ୍ମି ପରାପରବିବର୍ଜିତଃ .
ରୂପଂ ସ୍ମରନ୍ନିଜଂ ସ୍ଫାରଂ ମା ସ୍ମୃତ୍ଯା ସଂମିତୋ ଭବ .. ୧୩..
ଅଧ୍ଯାତ୍ମଶାସ୍ତ୍ରମନ୍ତ୍ରେଣ ତୃଷ୍ଣାବିଷବିଷୂଚିକା .
କ୍ଷୀଯତେ ଭାବିତେନାନ୍ତଃ ଶରଦା ମିହିକା ଯଥା .. ୧୪..
ପରିଜ୍ଞାଯ ପରିତ୍ଯାଗୋ ବାସାନାନଂ ଯ ଉତ୍ତମଃ .
ସତ୍ତାସାମାନ୍ଯରୂପତ୍ବାତ୍ତତ୍କୈବଲ୍ଯପଦଂ ବିଦୁଃ .. ୧୫..
ଯନ୍ନାସ୍ତି ବାସନା ଲୀନା ତତ୍ସୁଷୁପ୍ତଂ ନ ସିଦ୍ଧଯେ .
ନିର୍ବୀଜା ବାସନା ଯତ୍ର ତତ୍ତୁର୍ଯଂ ସିଦ୍ଧିଦଂ ସ୍ମୃତମ୍ .. ୧୬..
ବାସନାଯାସ୍ତଥା ବହ୍ନେରୃଣବ୍ଯାଧିଦ୍ବିଷାମପି .
ସ୍ନେହବୈରବିଷାଣ ଚ ଶେଷଃ ସ୍ବଲ୍ପୋଽପି ବାଧତେ .. ୧୭..
ନିର୍ଦଗ୍ଧବାସନାବୀଜଃ ସତ୍ତାସାମାନ୍ଯରୂପବାନ୍ .
ସଦେହୋ ବା ବିଦେହୋ ବା ନ ଭୂଯୋ ଦୁଃଖଭାଗ୍ଭବେତ୍ .. ୧୮..
ଏତାବଦେବାବିଦ୍ଯାତ୍ବଂ ନେଦଂ ବ୍ରହ୍ମେତି ନିଶ୍ଚଯଃ .
ଏଷ ଏବ କ୍ଷଯସ୍ତସ୍ଯା ବ୍ରହ୍ମେଦମିତି ନିଶ୍ଚଯଃ .. ୧୯..
ବ୍ରହ୍ମ ଚିଦ୍ବ୍ରହ୍ମ ଭୁବନଂ ବ୍ରହ୍ମ ଭୂତପରମ୍ପରା .
ବ୍ରହ୍ମାହଂ ବ୍ରହ୍ମ ଚିଚ୍ଛତ୍ରୁର୍ବ୍ରହ୍ମ ଚିନ୍ମିତ୍ରବାନ୍ଧବାଃ .. ୨୦..
ବ୍ରହ୍ମୈବ ସର୍ବମିତ୍ଯେବ ଭାବିତେ ବ୍ରହ୍ମ ବୈ ପୁମାନ୍ .
ସର୍ବତ୍ରାବସ୍ଥିତଂ ଶାନ୍ତଂ ଚିଦ୍ବ୍ରହ୍ମେତ୍ଯନୁଭୂଯତେ .. ୨୧..
ଅସଂସ୍କୃତାଧ୍ବଗାଲୋକେ ମନସ୍ଯନ୍ଯତ୍ର ସଂସ୍ଥିତେ .
ଯା ପ୍ରତୀତିରନାଗସକା ତଚ୍ଚିଦ୍ବ୍ରହ୍ମାସ୍ମି ସର୍ବଗମ୍ .. ୨୨..
ପ୍ରଶାନ୍ତସର୍ବସଂକଲ୍ପଂ ବିଗତାଖିଲକୌତୁକମ୍ .
ବିଗତାଶେଷସଂରଂଭଂ ଚିଦାତ୍ମାନଂ ସମାଶ୍ରଯ .. ୨୩..
ଏବଂ ପୂର୍ଣଧିଯୋ ଧୀରାଃ ସମା ନୀରାଗଚେତସଃ .
ନ ନନ୍ଦନ୍ତି ନ ନିନ୍ଦନ୍ତି ଜୀବିତଂ ମରଣଂ ତଥା .. ୨୪..
ପ୍ରାଣୋଽଯମନିଶଂ ବ୍ରହ୍ମସ୍ପନ୍ଦଶକ୍ତିଃ ସଦାଗତିଃ .
ସବାହ୍ଯାଭ୍ଯନ୍ତରେ ଦେହେପ୍ରାଣୋଽସାବୂର୍ଧ୍ବଗଃ ସ୍ଥିତଃ .. ୨୫..
ଅପାନୋଽପ୍ଯନିଶଂ ବ୍ରହ୍ମସ୍ପନ୍ଦଶକ୍ତିଃ ସଦାଗତିଃ .
ସବାହ୍ଯାଭ୍ଯନ୍ତରେ ଦେହେ ଅପାନୋଽଯମବାକ୍ସ୍ଥିତଃ .. ୨୬..
ଜାଗ୍ରତଃ ସ୍ବପତଶ୍ଚୈବ ପ୍ରାଣାଯାମୋଽଯମୁତ୍ତମଃ .
ପ୍ରବର୍ତତେ ହ୍ଯଭିଜ୍ଞସ୍ଯ ତଂ ତାବଚ୍ଛ୍ରେଯସେ ଶୃଣୁ .. ୨୭..
ଦ୍ବାଦଶାଙ୍ଗୁଲପର୍ଯନ୍ତଂ ବାହ୍ଯମାକ୍ରମତାଂ ତତଃ .
ପ୍ରାଣାଙ୍ଗନାମା ସଂସ୍ପର୍ଶୋ ଯଃ ସ ପୂରକ ଉଚ୍ଯତେ .. ୨୮..
ଅପାନଶ୍ଚନ୍ଦ୍ରମା ଦେହମାପ୍ଯାଯଯତି ସୁବ୍ରତ .
ପ୍ରାଣଃ ସୂର୍ଯୋଽଗ୍ନିରଥ ବା ପଚତ୍ଯନତ୍ରିଦଂ ବପୁଃ .. ୨୯..
ପ୍ରାଣକ୍ଷଯସମୀପସ୍ଥମପାନୋଦଯକୋଟିଗମ୍ .
ଅପାନପ୍ରାଣଯୋରୈକ୍ଯଂ ଚିଦାତ୍ମାନଂ ସମାଶ୍ରଯ .. ୩୦..
ଅପାନୋଽସ୍ତଂଗତୋ ଯତ୍ର ପ୍ରାଣୋ ନାଭ୍ଯୁଦିତଃ କ୍ଷଣମ୍ .
କଲାକଲଙ୍କରହିତଂ ତଚ୍ଚିତ୍ତତ୍ତ୍ବଂ ସମାଶ୍ରଯ .. ୩୧..
ନାପାନୋଽସ୍ତଂଗତୋ ଯତ୍ର ପ୍ରାଣଶ୍ଚାସ୍ତମୁପାଗତଃ .
ନାସାଗ୍ରଗମନାବର୍ତଂ ତଚ୍ଚିତ୍ତତ୍ତ୍ବମୁପାଶ୍ରଯ .. ୩୨..
ଆଭାସମାତ୍ରମେବେଦଂ ନ ସନାସଜ୍ଜଗତ୍ତ୍ରଯମ୍ .
ଇତ୍ଯନ୍ଯକଲନାତ୍ଯାଗଂ ସମ୍ଯଗ୍ଜ୍ଞାନଂ ବିଦୁର୍ବୁଧାଃ .. ୩୩..
ଆଭାସମାତ୍ରକଂ ବ୍ରହ୍ମଂଶ୍ଚିତ୍ତଦର୍ଶକଲଙ୍କିତମ୍ .
ତତସ୍ତଦପି ସଂତ୍ଯଜ୍ଯ ନିରାଭାସୋ ଭବୋତ୍ତମ ..୩୪..
ଭଯପ୍ରଦମକଲ୍ଯାଣଂ ଧୈର୍ଯସର୍ବସ୍ବହାରିଣମ୍ .
ମନଃପିଶାଚମୁତ୍ସାର୍ଯ ଯୋଽସି ସୋଽସି ସ୍ଥିରୋ ଭବ .. ୩୫..
ଚିଦ୍ବ୍ଯୋମେବ କିଲାସ୍ତୀହ ପରାପରବିବର୍ଜିତମ୍ .
ସର୍ବତ୍ରାସଂଭବଚ୍ଚୈତ୍ଯଂ ଯତ୍କଲ୍ପାନ୍ତେଽବଶିଷ୍ଯତେ .. ୩୬..
ବାଞ୍ଛାକ୍ଷଣେ ତୁ ଯା ତୁଷ୍ଟିସ୍ତତ୍ର ବାଞ୍ଛୈବ କାରଣମ୍ .
ତୁଷ୍ଟିସ୍ତ୍ବତୁଷ୍ଟିପର୍ଯନ୍ତା ତସ୍ମାଦ୍ବାଞ୍ଛାଂ ପରିତ୍ଯଜ .. ୩୭..
ଆଶା ଯାତୁ ନିରାଶାତ୍ବମଭାବଂ ଯାତୁ ଭାବନା .
ଅମନସ୍ତ୍ବଂ ମନୋ ଯାତୁ ତବାସଙ୍ଗେନ ଜୀବତଃ .. ୩୮..
ବାସନାରହିତୈରନ୍ତରିନ୍ଦ୍ରିଯୈରାହରନ୍କ୍ରିଯା .
ନ ବିକାରମବାପ୍ନୋଷି ଖବତ୍କ୍ଷୋଭଶତୈରପି .. ୩୯..
ଚିତ୍ତୋନ୍ମେଷନିମେଷାଭ୍ଯାଂ ସଂସାରପ୍ରଲଯୋଦଯୌ .
ବାସନାପ୍ରାଣସଂରୋଧମନୁନ୍ମେଷଂ ମନଃ କୁରୁ .. ୪୦..
ପ୍ରାଣୋନ୍ମେଷନିମେଷାଭ୍ଯାଂ ସଂସୃତେଃ ପ୍ରଲଯୋଦଯୌ .
ତମଭ୍ଯାସପ୍ରଯୋଗାଭ୍ଯାମୁନ୍ମେଷରହିତଂ କୁରୁ .. ୪୧..
ମୌର୍ଖ୍ଯୋନ୍ମେଷନିମେଷାଭ୍ଯାଂ କର୍ମଣାଂ ପ୍ରଲଯୋଦଯୌ .
ତଦ୍ବିଲୀନଂ କୁରୁ ବଲାଦ୍ଗୁରୁଶାସ୍ତ୍ରାର୍ଥସଂଗମୈଃ .. ୪୨..
ଅସଂବିତ୍ସ୍ପନ୍ଦମାତ୍ରେଣ ଯାତି ଚିତ୍ତମଚିତ୍ତତାମ୍ .
ପ୍ରାଣାନାଂ ବା ନିରୋଧେନ ତଦେବ ପରମଂ ପଦମ୍ .. ୪୩..
ଦୃଶ୍ଯଦର୍ଶନସଂବନ୍ଧେ ଯତ୍ସୁଖଂ ପାରମାର୍ଥିକମ୍ .
ତଦନ୍ତୈକାନ୍ତସଂବିତ୍ତ୍ଯା ବ୍ରହ୍ମଦୃଷ୍ଟ୍ଯାବଲୋକଯ .. ୪୪..
ଯତ୍ର ନାଭ୍ଯୁଦିତଂ ଚିତ୍ତଂ ତଦ୍ବୈ ସୁଖମକୃତ୍ରିମମ୍ .
କ୍ଷଯାତିଶଯନିର୍ମୁକ୍ତଂ ନୋଦେତି ନ ଚ ଶାମ୍ଯତି .. ୪୫..
ଯସ୍ଯ ଚିତ୍ତଂ ନ ଚିତ୍ତାଖ୍ଯଂ ଚିତ୍ତଂ ଚିତ୍ତତ୍ତ୍ବମେବ ହି .
ତଦେବ ତୁର୍ଯାବସ୍ଥାଯଂ ତୁର୍ଯାତୀତଂ ଭବତ୍ଯତଃ .. ୪୬..
ସଂନ୍ଯସ୍ତସର୍ବସଂକଲ୍ପଃ ସମଃ ଶାନ୍ତମନା ମୁନିଃ .
ସଂନ୍ଯାସଯୋଗଯୁକ୍ତାତ୍ମା ଜ୍ଞାନବାନ୍ମୋକ୍ଷବାନ୍ଭବ .. ୪୭..
ସର୍ବସଂକଲ୍ପସଂଶାନ୍ତଂ ପ୍ରଶାନ୍ତଘନବାସନମ୍ .
ନ କିଂଚିଦ୍ଭାବନାକାରଂ ଯତ୍ତଦ୍ବ୍ରହ୍ମ ପରଂ ବିଦୁଃ .. ୪୮..
ସମ୍ଯଗ୍ଜ୍ଞାନାବରୋଧେନ ନିତ୍ଯମେକସମାଧିନା .
ସାଂଖ୍ଯ ଏବାବବୁଦ୍ଧା ଯେ ତେ ସାଂଖ୍ଯା ଯୋଗିନଃ ପରେ .. ୪୯..
ପ୍ରାଣାଦ୍ଯନିଲସଂଶାନ୍ତୌ ଯୁକ୍ତ୍ଯା ଯେ ପଦମାଗତାଃ .
ଅନାମଯମନାଦ୍ଯନ୍ତଂ ତେ ସ୍ମୃତା ଯୋଗଯୋଗିନଃ .. ୫୦..
ଉପାଦେଯଂ ତୁ ସର୍ବେଷାଂ ଶାତଂ ପଦମକୃତ୍ରିମମ୍ .
ଏକାର୍ଥାଭ୍ଯସନଂ ପ୍ରାଣରୋଧଶ୍ଚେତଃ ପରିକ୍ଷଯଃ .. ୫୧..
ଏକସ୍ମିନ୍ନେବ ସଂସିଦ୍ଧେ ସଂସିଦ୍ଧ୍ଯନ୍ତି ପରସ୍ପରମ୍ .
ଅବିନାଭାବିନୀ ନିତ୍ଯଂ ଜନ୍ତୂନାଂ ପ୍ରାଣଚେତସୀ .. ୫୨..
ଆଧାରାଧେଯବଚ୍ଚୈତେ ଏକଭାବେ ବିନଶ୍ଯତଃ .
କୁରୁତଃ ସ୍ବବିନାଶେନ କାର୍ଯଂ ମୋକ୍ଷାଖ୍ଯମୁତ୍ତମମ୍ .. ୫୩..
ସର୍ବମେତଦ୍ଧିଯା ତ୍ଯକ୍ତ୍ବା ଯଦି ତିଷ୍ଠସି ନିଶ୍ଚଲଃ .
ତଦାହଂକାରବିଲଯେ ତ୍ବମେବ ପରମଂ ପଦମ୍ .. ୫୪..
ମହାଚିଦେକୈବେହାସ୍ତି ମହାସତ୍ତେତି ଯୋଚ୍ଯତେ .
ନିଷ୍କଲଂକା ସମା ଶୁଦ୍ଧା ନିରହଂକାରରୂପିଣୀ .. ୫୫..
ସକୃଦ୍ବିଭାତା ବିମଲା ନିତ୍ଯୋଦଯବତୀ ସମା .
ସା ବ୍ରହ୍ମ ପରମାତ୍ମେତି ନାମଭିଃ ପରିଗୀଯତେ .. ୫୬..
ସୈବାହମିତି ନିଶ୍ଚିତ୍ଯ ନିଦାଘ କୃତକୃତ୍ଯବାନ୍ .
ନ ଭୂତଂ ନ ଭବିଷ୍ଯଚ୍ଚ ଚିନ୍ତଯାମି କଦାଚନ .. ୫୭..
ଦୃଷ୍ଟିମାଲମ୍ବ୍ଯ ତିଷ୍ଠାମି ବର୍ତମାନାମିହାତ୍ମନା .
ଇଦମଦ୍ଯ ମଯା ଲବ୍ଧମିଦଂ ପ୍ରାପ୍ସ୍ଯାମି ସୁନ୍ଦରମ୍ .. ୫୮..
ନ ସ୍ତୌମି ନ ଚ ନିନ୍ଦାମି ଆତ୍ମନୋଽନ୍ଯନ୍ନହି କ୍ବଚିତ୍ .
ନ ତୁଷ୍ଯାମି ଶୁଭପ୍ରାପ୍ତୌ ନ ଖିଦ୍ଯାମ୍ଯଶୁଭାଗମେ .. ୫୯..
ପ୍ରଶାନ୍ତଚାପଲଂ ବୀତଶୋକମସ୍ତସମୀହିତମ୍ .
ମନୋ ମମ ମୁନେ ଶାନ୍ତଂ ତେନ ଜୀବାମ୍ଯନାମଯଃ .. ୬୦..
ଅଯଂ ବନ୍ଧୁଃ ପରଶ୍ଚାଯଂ ମମାଯମଯମନ୍ଯକଃ .
ଇତି ବ୍ରହ୍ମନ୍ନ ଜାନାମି ସଂସ୍ପର୍ଶଂ ନ ଦଦାମ୍ଯହମ୍ .. ୬୧..
ବାସନାମାତ୍ରସଂତ୍ଯାଗାଜ୍ଜରାମରଣବର୍ଜିତମ୍ .
ସବାସନଂ ମନୋ ଜ୍ଞାନଂ ଜ୍ଞେଯଂ ନିର୍ବାସନଂ ମନଃ .. ୬୨..
ଚିତ୍ତେ ତ୍ଯକ୍ତେ ଲଯଂ ଯାତି ଦ୍ବୈତମେତଚ୍ଚ ସର୍ବତଃ .
ଶିଷ୍ଯତେ ପରମଂ ଶାନ୍ତମେକମଗଚ୍ଛମନାମଯମ୍ .. ୬୩..
ଅନନ୍ତମଜମବ୍ଯକ୍ତମଜରଂ ଶାନ୍ତମଚ୍ଯୁତମ୍ .
ଅଦ୍ବିତୀଯମନାଦ୍ଯନ୍ତଂ ଯଦାଦ୍ଯମୁପଲମ୍ଭନମ୍ .. ୬୪..
ଏକମାଦ୍ଯନ୍ତରହିତଂ ଚିନ୍ମାତ୍ରମମଲଂ ତତମ୍ .
ଖାଦପ୍ଯତିତରାଂ ସୂକ୍ଷ୍ମଂ ତଦ୍ବ୍ରହ୍ମାସ୍ମି ନ ସଂଶଯଃ .. ୬୫..
ଦିକ୍କାଲାଦ୍ଯନବଚ୍ଛିନ୍ନଂ ସ୍ବଚ୍ଛଂ ନିତ୍ଯୋଦିତଂ ତତମ୍ .
ସର୍ବାର୍ଥମଯମେକାର୍ଥଂ ଚିନ୍ମାତ୍ରମମଲଂ ଭବ .. ୬୬..
ସର୍ବମେକମିଦଂ ଶାନ୍ତମାଦିମଧ୍ଯାନ୍ତବର୍ଜିତମ୍ .
ଭାବାଭାବମଜଂ ସର୍ବମିତି ମତ୍ବା ସୁଖୀ ଭବ .. ୬୭..
ନ ବଦ୍ଧୋଽସ୍ମି ନ ମୁକ୍ତୋଽସ୍ମି ବ୍ରହ୍ମୈବାସ୍ମି ନିରାମଯମ୍ .
ଦ୍ବୈତଭାବବିମୁକ୍ତୋଽସ୍ମି ସଚ୍ଚିଦାନନ୍ଦଲକ୍ଷଣଃ .
ଏବଂ ଭାବଯ ଯତ୍ନେନ ଜୀବନ୍ମୁକ୍ତୋ ଭବିଷ୍ଯସି .. ୬୮..
ପଦାର୍ଥବୃନ୍ଦେ ଦେହାଦିଧିଯା ସଂତ୍ଯଜ୍ଯ ଦୂରତଃ .
ଆଶୀତଲାନ୍ତଃକରଣୋ ନିତ୍ଯମାତ୍ମପରୋ ଭବ .. ୬୯..
ଇଦଂ ରମ୍ଯମିଦଂ ନେତି ବୀଜଂ ତେ ଦୁଃଖସଂତତେଃ .
ତସ୍ମିନ୍ସାମ୍ଯାଗ୍ନିନା ଦଗ୍ଧେ ଦୁଃଖସ୍ଯାବସରଃ କୁତଃ .. ୭୦..
ଶାସ୍ତ୍ରସଜ୍ଜନସଂପର୍କୈଃ ପ୍ରଜ୍ଞାମାଦୌ ବିବର୍ଧଯେତ୍ .. ୭୧..
ଋତଂ ସତ୍ଯଂ ପରଂ ବ୍ରହ୍ମ ସର୍ବସଂସାରଭେଷଜମ୍ .
ଅତ୍ଯର୍ଥମମଲଂ ନିତ୍ଯମାଦିମଧ୍ଯାନ୍ତବର୍ଜିତମ୍ .. ୭୨..
ତଥା ସ୍ଥୂଲମନାକାଶମସଂସ୍ପୃଶ୍ଯମଚାକ୍ଷୁଷମ୍ .
ନ ରସଂ ନ ଚ ଗନ୍ଧାଖ୍ଯମପ୍ରମେଯମନୂପମମ୍ .. ୭୩..
ଆତ୍ମାନଂ ସଚ୍ଚିଦାନନ୍ଦମନନ୍ତଂ ବ୍ରହ୍ମ ସୁବ୍ରତ .
ଅହମସ୍ମୀତ୍ଯଭିଧ୍ଯାଯେଦ୍ଧ୍ଯେଯାତୀତଂ ବିମୁକ୍ତଯେ .. ୭୪..
ସମାଧିଃ ସଂବିଦୁତ୍ପତ୍ତିଃ ପରଜୀବୈକତଂ ପ୍ରତି .
ନିତ୍ଯଃ ସର୍ବଗତୋ ହ୍ଯାତ୍ମା କୂଟସ୍ଥୋ ଦୋଷବର୍ଜିତଃ .. ୭୫..
ଏକଃ ସନ୍ଭିଦ୍ଯତେ ଭ୍ରାନ୍ତ୍ଯା ମାଯଯା ନ ସ୍ବରୂପତଃ .
ତସ୍ମାଦଦ୍ବୈତ ଏବାସ୍ତି ନ ପ୍ରପଞ୍ଚୋ ନ ସଂସୃତିଃ .. ୭୬..
ଯଥାକାଶୋ ଘଟାକାଶୋ ମହାକାଶ ଇତୀରିତଃ .
ତଥା ଭ୍ରାନ୍ତେର୍ଦ୍ବିଧା ପ୍ରୋକ୍ତୋ ହ୍ଯାତ୍ମା ଜୀବେଶ୍ବରାତ୍ମନା .. ୭୭..
ଯଦା ମନସି ଚୈତନ୍ଯଂ ଭାତି ସର୍ବତ୍ରଗଂ ସଦା .
ଯୋଗିନୋଽଽବ୍ଯବଧାନେନ ତଦା ସଂପଦ୍ଯତେ ସ୍ବଯମ୍ .. ୭୮..
ଯଦା ସର୍ବାଣି ଭୂତାନି ସ୍ବାତ୍ମନ୍ଯେବ ହି ପଶ୍ଯତି .
ସର୍ବଭୂତେଷୁ ଚାତ୍ମାନଂ ବ୍ରହ୍ମ ସଂପଦ୍ଯତେ ସଦା .. ୭୯..
ଯଦା ସର୍ବାଣି ଭୂତାନି ସମାଧିସ୍ଥୋ ନ ପଶ୍ଯତି .
ଏକୀଭୂତଃ ପରେଣାସୌ ତଦା ଭବତି କେବଲଃ .. ୮୦..
ଶାସ୍ତ୍ରସଜ୍ଜନସଂପର୍କବୈରାଗ୍ଯାଭ୍ଯାସରୂପିଣୀ .
ପ୍ରଥମା ଭୂମିକୈଷୋକ୍ତା ମୁମୁକ୍ଷୁତ୍ବପ୍ରଦାଯିନୀ .. ୮୧..
ବିଚାରଣା ଦ୍ବିତୀଯା ସ୍ଯାତ୍ତୃତୀଯା ସାଙ୍ଗଭାବନା .
ବିଲାପିନୀ ଚତୁର୍ଥୀ ସ୍ଯାଦ୍ବାସନା ବିଲଯାତ୍ମିକା .. ୮୨..
ଶୁଦ୍ଧସଂବିନ୍ମନାନନ୍ଦରୂପା ଭବତି ପଞ୍ଚମୀ .
ଅର୍ଧସୁପ୍ତପ୍ରବୁଦ୍ଧାଭୋ ଜୀବନ୍ମୁକ୍ତୋଽତ୍ର ତିଷ୍ଠତି .. ୮୩..
ଅସଂବେଦନରୂପା ଚ ଷଷ୍ଠୀ ଭବତି ଭୂମିକା .
ଆନନ୍ଦୈକଘନାକାରା ସୁଷୁପ୍ତସଦୃଶୀ ସ୍ଥିତିଃ .. ୮୪..
ତୁର୍ଯାବସ୍ଥୋପଶାନ୍ତା ସା ମୁକ୍ତିରେବ ହି କେବଲା .
ସମତା ସ୍ବଚ୍ଛତା ସୌମ୍ଯା ସପ୍ତମୀ ଭୂମିକା ଭବେତ୍ .. ୮୫..
ତୁର୍ଯାତୀତା ତୁ ଯାବସ୍ଥା ପରା ନିର୍ବାଣରୂପିଣୀ .
ସପ୍ତମୀ ସା ପରା ପ୍ରୌଢା ବିଷଯୋ ନୈବ ଜୀବତାମ୍ .. ୮୬..
ପୂର୍ବାବସ୍ଥାତ୍ରଯଂ ତତ୍ର ଜାଗ୍ରଦିତ୍ଯେବ ସଂସ୍ଥିତମ୍ .
ଚତୁର୍ଥୀ ସ୍ବପ୍ନ ଇତ୍ଯୁକ୍ତା ସ୍ବପ୍ନାଭଂ ଯତ୍ର ବୈ ଜଗତ୍ .. ୮୭..
ଆନନ୍ଦୈକଘନାକାରା ସୁଷୁପ୍ତାଖ୍ଯା ତୁ ପଞ୍ଚମୀ .
ଅସଂବେଦନରୂପା ତୁ ଷଷ୍ଠୀ ତୁର୍ଯପଦାଭିଧା .. ୮୮..
ତୁର୍ଯାତୀତପଦାବସ୍ଥା ସପ୍ତମୀ ଭୂମିକୋତ୍ତମା .
ମନୋବଚୋଭିରଗ୍ରାହ୍ଯା ସ୍ବପ୍ରକାଶସଦାତ୍ମିକା .. ୮୯..
ଅନ୍ତଃ ପ୍ରତ୍ଯାହୃତିବଶାଚ୍ଚୈତ୍ଯଂ ଚେନ୍ନ ବିଭାବିତମ୍ .
ମୁକ୍ତ ଏବ ନ ସନ୍ଦେହୋ ମହାସମତଯା ତଯା .. ୯୦..
ନ ମ୍ରିଯେ ନ ଚ ଜୀବାମି ନାହଂ ସନ୍ନାପ୍ଯସନ୍ମଯଃ .
ଅହଂ ନ କିଂଚିଚ୍ଚିଦିତି ମତ୍ବା ଧୀରୋ ନ ଶୋଚତି .. ୯୧..
ଅଲେପକୋଽହମଜରୋ ନୀରାଗଃ ଶାନ୍ତବାସନଃ .
ନିରଂଶୋଽସ୍ମି ଚିଦାକାଶମିତି ମତ୍ବା ନ ଶୋଚତି .. ୯୨..
ଅହଂମତ୍ଯା ବିରହିତଃ ଶୁଦ୍ଧୋ ବୁଦ୍ଧୋଽଜରୋଽମରଃ .
ଶାନ୍ତଃ ଶମସମାଭାସ ଇତି ମତ୍ବା ନ ଶୋଚତି .. ୯୩..
ତୃଣାଗ୍ରେଷ୍ବମ୍ବରେ ଭାନୌ ନରନାଗାମରେଷୁ ଚ .
ଯତ୍ତିଷ୍ଠତି ତଦେବାହମିତି ମତ୍ବା ନ ଶୋଚତି .. ୯୪..
ଭାବନାଂ ସର୍ବଭାବେଭ୍ଯଃ ସମୁତ୍ସୃଜ୍ଯ ସମୁତ୍ଥିତଃ .
ଅବଶିଷ୍ଟଂ ପରଂ ବ୍ରହ୍ମ କେବଲୋଽସ୍ମୀତି ଭାବଯ .. ୯୫..
ବାଚାମତୀତବିଷଯୋ ବିଷଯାଶାଦଶୋଜ୍ଝିତଃ .
ପରାନନ୍ଦରସାକ୍ଷୁବ୍ଧୋ ରମତେ ସ୍ବାତ୍ମନାତ୍ମନି .. ୯୬..
ସର୍ବକର୍ମପରିତ୍ଯାଗୀ ନିତ୍ଯତୃପ୍ତୋ ନିରାଶ୍ରଯଃ .
ନ ପୁଣ୍ଯେନ ନ ପାପେନ ନେତରେଣ ଚ ଲିପ୍ଯତେ .. ୯୭..
ସ୍ଫଟିକଃ ପ୍ରତିବିମ୍ବେନ ଯଥା ନାଯାତି ରଞ୍ଜନମ୍ .
ତଜ୍ଜ୍ଞଃ କର୍ମଫଲେନାନ୍ତସ୍ତଥା ନାଯାତି ରଞ୍ଜନମ୍ .. ୯୮..
ବିହରଞ୍ଜନତାବୃନ୍ଦେ ଦେବକୀର୍ତନ ପୂଜନୈଃ .
ଖେଦାହ୍ଲାଦୌ ନ ଜାନାତି ପ୍ରତିବିମ୍ବଗତୈରିବ .. ୯୯..
ନିସ୍ସ୍ତୋତ୍ରୋ ନିର୍ବିକାରଶ୍ଚ ପୂଜ୍ଯପୂଜାବିବର୍ଜିତଃ .
ସଂଯୁକ୍ତଶ୍ଚ ବିଯୁକ୍ତଶ୍ଚ ସର୍ବାଚାରନଯକ୍ରମୈଃ .. ୧୦୦..
ତନୁଂ ତ୍ଯଜତୁ ବା ତୀର୍ଥେ ଶ୍ବପଚସ୍ଯ ଗୃହେଽଥ ବା .
ଜ୍ଞାନସଂପତ୍ତିସମଯେ ମୁକ୍ତୋଽସୌ ବିଗତାଶଯଃ .. ୧୦୧..
ସଂକଲ୍ପତ୍ବଂ ହି ବନ୍ଧସ୍ଯ କାରଣଂ ତତ୍ପରିତ୍ଯଜ .
ମୋକ୍ଷୋ ଭବେଦସଂକଲ୍ପାତ୍ତଦଭ୍ଯାସଂ ଧିଯା କୁରୁ .. ୧୦୨..
ସାବଧାନୋ ଭବ ତ୍ବଂ ଚ ଗ୍ରାହ୍ଯଗ୍ରାହକସଂଗମେ .
ଅଜସ୍ରମେବ ସଂକଲ୍ପଦଶାଃ ପରିହରଞ୍ଶନୈଃ .. ୧୦୩..
ମା ଭବ ଗ୍ରାହ୍ଯଭାବାତ୍ମା ଗ୍ରାହକାତ୍ମା ଚ ମା ଭବ .
ଭାବନାମଖିଲାଂ ତ୍ଯକ୍ତ୍ବା ଯଚ୍ଛିଷ୍ଟଂ ତନ୍ମଯୋ ଭବ .. ୧୦୪..
କିଂଚିଚ୍ଚେଦ୍ରୋଚତେ ତୁଭ୍ଯଂ ତଦ୍ବଦ୍ଧୋଽସି ଭବସ୍ଥିତୌ .
ନ କିଂଚିଦ୍ରୋଚତେ ଚେତ୍ତେ ତନ୍ମୁକ୍ତୋଽସି ଭବସ୍ଥିତୌ .. ୧୦୫..
ଅସ୍ମାତ୍ପଦାର୍ଥନିଚଯାଦ୍ଯାବତ୍ସ୍ଥାବରଜଙ୍ଗମାତ୍ .
ତୃଣାଦେର୍ଦେହପର୍ଯନ୍ତାନ୍ମା କିଂଚିତ୍ତତ୍ର ରୋଚତାମ୍ .. ୧୦୬..
ଅହଂଭାବାନହଂଭାବୌ ତ୍ଯକ୍ତ୍ବା ସଦସତୀ ତଥା .
ଯଦସକ୍ତଂ ସମଂ ସ୍ବଚ୍ଛଂ ସ୍ଥିତଂ ତତ୍ତୁର୍ଯମୁଚ୍ଯତେ .. ୧୦୭..
ଯା ସ୍ବଚ୍ଛା ସମତା ଶାନ୍ତା ଜୀବନ୍ମୁକ୍ତବ୍ଯବସ୍ଥିତିଃ .
ସାକ୍ଷ୍ଯବସ୍ଥା ବ୍ଯବହୃତୌ ସା ତୁର୍ଯା କଲନୋଚ୍ଯତେ .. ୧୦୮..
ନୈତଜ୍ଜାଗ୍ରନ୍ନ ଚ ସ୍ବପ୍ନଃ ସଂକଲ୍ପାନାମସଂଭବାତ୍ .
ସୁଷୁପ୍ତଭାବୋ ନାଽପ୍ଯେତଦଭାବାଜ୍ଜଡତାସ୍ଥିତେଃ .. ୧୦୯..
ଶାନ୍ତସମ୍ଯକ୍ପ୍ରବୁଦ୍ଧାନାଂ ଯଥାସ୍ଥିତମିଦଂ ଜଗତ୍ .
ବିଲୀନଂ ତୁର୍ଯମିତ୍ଯାହୁରବୁଦ୍ଧାନାଂ ସ୍ଥିତଂ ସ୍ଥିରମ୍ .. ୧୧୦..
ଅହଂକାରକଲାତ୍ଯାଗେ ସମତାଯାଃ ସମୁଦ୍ଗମେ .
ବିଶରାରୌ କୃତେ ଚିତ୍ତେ ତୁର୍ଯାବସ୍ଥୋପତିଷ୍ଠତେ .. ୧୧୧..
ସିଦ୍ଧାନ୍ତୋଽଧ୍ଯାତ୍ମଶାସ୍ତ୍ରାଣାଂ ସର୍ବାପହ୍ନବ ଏବ ହି .
ନାବିଦ୍ଯାସ୍ତୀହ ନୋ ମାଯା ଶାନ୍ତଂ ବ୍ରହ୍ମେଦମକ୍ଲମମ୍ .. ୧୧୨..
ଶାନ୍ତ ଏବ ଚିଦାକାଶେ ସ୍ବଚ୍ଛେ ଶମସମାତ୍ମନି .
ସମଗ୍ରଶକ୍ତିଖଚିତେ ବ୍ରହ୍ମେତି କଲିତାଭିଧେ .. ୧୧୩..
ସର୍ବମେବ ପରିତ୍ଯଜ୍ଯ ମହାମୌନୀ ଭବାନଘ .
ନିର୍ବାଣବାନ୍ନିର୍ମନନଃ କ୍ଷୀଣଚିତ୍ତଃ ପ୍ରଶାନ୍ତଧୀଃ .. ୧୧୪..
ଆତ୍ମନ୍ଯେବାସ୍ବ ଶାନ୍ତାତ୍ମା ମୂକାନ୍ଧବଧିରୋପମଃ .
ନିତ୍ଯମନ୍ତର୍ମୁଖଃ ସ୍ବଚ୍ଛଃ ସ୍ବାତ୍ମନାନ୍ତଃ ପ୍ରପୂର୍ଣଧୀଃ .. ୧୧୫..
ଜାଗ୍ରତ୍ଯେବ ସୁଷୁପ୍ତସ୍ଥଃ କୁରୁ କର୍ମାଣି ବୈ ଦ୍ବିଜ .
ଅନ୍ତଃ ସର୍ବପରିତ୍ଯାଗୀ ବହିଃ କୁରୁ ଯଥାଗତମ୍ .. ୧୧୬..
ଚିତ୍ତସତ୍ତା ପରଂ ଦୁଃଖଂ ଚିତ୍ତତ୍ଯାଗଃ ପରଂ ସୁଖମ୍ .
ଅତଶ୍ଚିତ୍ତଂ ଚିଦାକାଶେ ନଯ କ୍ଷଯମବେଦନାତ୍ .. ୧୧୭..
ଦୃଷ୍ଟ୍ବା ରମ୍ଯମରମ୍ଯଂ ବା ସ୍ଥେଯଂ ପାଷାଣବତ୍ସଦା .
ଏତାବତାତ୍ମଯତ୍ନେନ ଜିତା ଭବତି ସଂସୃତିଃ .. ୧୧୮..
ବେଦାନ୍ତେ ପରମଂ ଗୁହ୍ଯଂ ପୁରାକଲ୍ପପ୍ରଚୋଦିତମ୍ .
ନାପ୍ରଶାନ୍ତାଯ ଦାତବ୍ଯଂ ନ ଚାଶିଷ୍ଯାଯ ବୈ ପୁନଃ .. ୧୧୯..
ଅନ୍ନପୂର୍ଣୋପନିଷଦଂ ଯୋଽଧୀତେ ଗୁର୍ବନୁଗ୍ରହାତ୍ .
ସ ଜୀବନ୍ମୁକ୍ତତାଂ ପ୍ରାପ୍ଯ ବ୍ରହ୍ମୈବ ଭବତି ସ୍ବଯମ୍ .. ୧୨୦..
ଇତ୍ଯୁପନିଷତ୍ .. ଇତି ପଞ୍ଚମୋଽଧ୍ଯାଯଃ .. ୫..
୐ ଭଦ୍ରଂ କର୍ଣେଭିଃ ଶୃଣୁଯାମ ଦେବାଃ .. ଭଦ୍ରଂ ପଶ୍ଯେମାକ୍ଷଭିର୍ଯଜତ୍ରାଃ ..
ସ୍ଥିରୈରଙ୍ଗୈସ୍ତୁଷ୍ଟୁବାଁସସ୍ତନୂଭିଃ .. ବ୍ଯଶେମ ଦେବହିତଂ ଯଦାଯୁଃ ..
ସ୍ବସ୍ତି ନ ଇନ୍ଦ୍ରୋ ବୃଦ୍ଧଶ୍ରବାଃ .. ସ୍ବସ୍ତି ନଃ ପୂଷା ବିଶ୍ବବେଦାଃ ..
ସ୍ବସ୍ତି ନସ୍ତାର୍କ୍ଷ୍ଯୋ ଅରିଷ୍ଟନେମିଃ .. ସ୍ବସ୍ତି ନୋ ବୃହସ୍ପତିର୍ଦଧାତୁ ..
୐ ଶାନ୍ତିଃ ଶାନ୍ତିଃ ଶାନ୍ତିଃ ..
ଇତ୍ଯନ୍ନପୂର୍ଣୋପନିଷତ୍ସମାପ୍ତା ..

Encoded by Sunder Hattangadi (sunderh@hotmail.com)

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com